Kapaciteti për investim pritet të jetë një faktor kyç në betejën për kontrollin e basketbollit europian dhe EuroLiga ka vendosur të dalë në treg. Klubet aksionere kanë dhënë miratimin për një plan që synon sigurimin e 2.5 miliardë eurove investime. Fondet do të dedikohen kryesisht për rinovimin dhe ndërtimin e arenave në tregje strategjike, si dhe për modernizimin e modelit të biznesit.
Në mbledhjen e parë të pronarëve pas emërimit të Chus Bueno si CEO i ri, u miratua një plan për të eksploruar sigurimin e 1.5 miliardë eurove për iniciativa strategjike dhe 1 miliard euro të tjera për krijimin e një mjeti investimi që do të përshpejtojë zhvillimin dhe modernizimin e arenave, si dhe rritjen e të ardhurave nga “matchday”. Organizata vlerëson se aktualisht liga ka një vlerë mbi 1 miliard euro dhe objektivi i drejtimit të ri komercial është që brenda tre viteve kjo vlerë të arrijë në 2.5 miliardë euro, duke ndjekur një evolucion biznesi të ngjashëm me strategjinë që NBA po projekton për një kompeticion të mundshëm në Europë, ku fokusi kryesor janë gjithashtu arenat moderne.
Plani përfshin edhe vlerësimin e mundësisë për të hapur potencialisht derën për zgjerim në qytete të reja, një qasje e ngjashme me atë që synon NBA, si dhe rritjen e numrit të licencave për të garantuar stabilitet dhe vazhdimësi. Sipas komunikatës zyrtare, EuroLiga parashikon një rritje prej 9% të të ardhurave dhe 18% rritje në shpërndarjen për klubet.
Kujtojmë se një vit më parë ishte miratuar hyrja e fondit BC Partners në kapitalin e ligës, por negociatat dështuan në momentet e fundit. Oferta fillestare e vlerësonte kompeticionin në 1 miliard dollarë dhe parashikonte 330 milionë dollarë për blerjen e 33% të aksioneve. Liga ka theksuar gjithashtu përshpejtimin e strategjisë digjitale, zhvillimin e kanaleve direkte me konsumatorin dhe zgjerimin gjeografik strategjik. Synimi është optimizimi i qeverisjes, shkallëzimit operacional dhe performancës komerciale.
MARRËDHËNIET ME NBA DHE FIBA
Sa i përket negociatave me NBA dhe FIBA për krijimin e një lige të re europiane, EuroLiga ka konfirmuar se do të vazhdojë dialogun me NBA për të eksploruar një “kornizë partneriteti strategjik”, si në nivel lige ashtu edhe në nivel klubesh individuale. Menaxhmenti do të vijojë diskutimet me NBA dhe, pas përfundimit të procesit të saj për testimin e interesit të tregut, do të vlerësojë mundësitë e bashkëpunimit strategjik.
“MATCHDAY”, LEVA PËR RRITJEN E PËRFITIMIT
Modernizimi i arenave është shtylla kryesore për rritjen e rentabilitetit në ditën e ndeshjes. Frekuentimi mesatar është rritur me 80% në dekadën e fundit, duke arritur në 10.500 spektatorë për ndeshje, me një normë mbushjeje prej 84%. Mbi 3 milionë tifozë ndoqën fazën e rregullt nga tribunat, dhe kjo shifër pritet të rritet me zgjerimin e formatit. Edhe NBA beson fort në potencialin ekonomik të menaxhimit të arenave. Komisioneri i NBA, Adam Silver, ka deklaruar se madhësia komerciale e basketbollit përfaqëson vetëm 1% të tregut sportiv global, megjithëse është sporti i dytë më popullor, çka tregon hapësirë të madhe për rritje.
Gjatë vizitës së tij në Europë, Silver u takua me investitorë të interesuar për një kompeticion të ri evropian. Liga amerikane është hapur edhe ndaj fondeve sovrane si investitorë potencialë, por mbetet e kujdesshme, duke pranuar se projekti mund të kërkojë dekada për të arritur qëndrueshmëri të plotë. Në fund të vitit 2025, NBA identifikoi 12 qytete prioritare për zgjerim: Londrën dhe Mançesterin në Mbretërinë e Bashkuar, Parisin dhe Lionin në Francë, Madridin dhe Barcelonën në Spanjë, Milanon dhe Romën në Itali, Berlinin dhe Mynihun në Gjermani, si dhe Athinën e Stambollin.
ARENAT SI FAKTOR PËRCAKTUES
Arenat më të mëdha në Europë nuk janë domosdoshmërisht më modernet apo më teknologjiket. Projekte si “Roig Arena” në Valencia (investim rreth 600 milionë euro) dhe “Co-op Live” në Mançester po vendosin standarde të reja, të përshtatshme si për EuroLigën ashtu edhe për një hyrje të mundshme të NBA-së në Europë.
Në Mbretërinë e Bashkuar, projekti i “London Lions” parashikon ndërtimin e një arene të re me kapacitet 15.000 vende, me ambicien për të pritur ndeshje të NBA-së dhe për t’u kthyer në një nga impiantet referencë në Europë. Ndër arenat më moderne aktualisht konsiderohet “Accor Arena” në Paris, që ka pritur ndeshje të NBA-së dhe evente madhore si Lojërat Olimpike “Paris 2024”. Gjithashtu spikat “LDLC Arena”, shtëpia e Asvel Villeurbanne, klub i lidhur me Tony Parker.
