Kandidati i koalicionit ‘Bashkë Fitojmë’ për kryetar të Bashkisë Durrës, Igli Cara ka zhvilluar një takim me përfaqësues të Shoqatës së të verbërve. Këta të fundit e kanë vënë theksin te problematikat konkrete, që ndikojnë në cilësinë e jetës së tyre.
Kryetari i Shoqatës “Shpresë për të Verbrit”, Sajmir Farrici ka thënë ndër të tjera se sipas ligjit, transporti publik për këtë kategori duhet të jetë falas, ndërsa ai interurban me çmim të reduktuar, 50% të vlerës. Ai ka nënvizuar se, ky vendim vazhdon të mos gjejë zbatim nga Bashkia e Durrësit, megjithëse Komisioneri për Mbrojtjen nga Diskriminimi i ka dhënë të drejtë disa herë.
Zoti Cara e ka cilësuar si të papranueshme situatën, që vazhdon të jetë e njëjtë ndër vite, ndërsa ka risjellë në vëmendje përgjegjësinë dhe detyrimet e përcaktuara me ligj, por që nuk gjejnë zbatim nga Bashkia e Durrësit. Kandidati, që garon për të marrë drejtimin e këtij institucioni ka siguruar se pas 14 majit, situata do të ndryshojë.
Në të njëjtën kohë, zoti Cara është shprehur se mbështetja e tij do të jetë e vazhdueshme për këtë kategori.
(BalkanWeb)
