Një gjest mjaft i veçantë dhe me ngarkesë të lartë emocionale është shënuar mbrëmjen e kësaj të enjteje gjatë protestës masive që po zhvillohet për të pestën ditë radhazi para godinës së Kryeministrisë, kundër projektit të ndërtimit në zonën e mbrojtur të Zvërnecit.

Teksa tubimi po vijonte në mënyrë krejtësisht paqësore dhe qytetare, vëmendjen e të gjithëve e ka tërhequr një moment i rrallë mes turmës dhe forcave të rendit. Një prej qytetarëve protestues është shkëputur nga pjesa tjetër, duke iu afruar efektivëve të policisë që kishin blinduar kordonin e sigurisë, dhe u ka dhuruar atyre lule të kuqe dhe të bardha.

Sipas vetë pjesëmarrësve në marshim, ky gjest simbolik nuk ishte thjesht një mesazh paqeje, por u bë në shenjë të thellë solidariteti dhe respekti për efektivin e Policisë së Shtetit që humbi jetën tragjikisht gjatë një operacioni policor pak kohë më parë.

Efektivët e rreshtuar përballë qytetarëve e kanë pranuar me mjaft mirënjohje dhuratën, duke iu përgjigjur qytetarit me buzëqeshje dhe shtrëngim duarsh, përpara se të vijonin kryerjen e detyrës së tyre. Për gjatë gjithë mbrëmjes, lulet e bardha dhe të kuqe mbetën në duart e policëve teksa ata qëndronin në shërbim para ambienteve të Kryeministrisë, duke krijuar një kontrast të fortë me helmetat dhe mburojat e tyre.