Presidenti sirian Ahmad al-Sharaa dhe Presidenti i SHBA-së Donald Trump diskutuan të martën zhvillimet në fazën kalimtare të Sirisë, përpjekjet për të rritur sigurinë dhe stabilitetin, si dhe perspektivat për bashkëpunim dypalësh në një mënyrë që i shërben stabilitetit rajonal dhe ndërkombëtar.

Sipas një deklarate nga Presidenca Siriane, Sharaa mori një telefonatë “të gjatë” nga Trump.

Al-Sharaa riafirmoi “angazhimin e plotë të Sirisë ndaj unitetit të territorit të saj dhe sovranitetit të saj kombëtar”, duke theksuar gatishmërinë e shtetit për “ruajtjen e institucioneve të tij” dhe “forcimin e paqes civile”.

Ai theksoi gjithashtu “rëndësinë e unifikimit të përpjekjeve ndërkombëtare për të parandaluar kthimin e organizatave terroriste, kryesisht midis tyre DAESH-it”.

Al-Sharaa tha se “Siria e re” po përvetëson “një qasje të hapur” dhe po i shtrin dorën për bashkëpunim me të gjitha palët ndërkombëtare “mbi bazën e interesave të ndërsjella dhe respektit të ndërsjellë”.

Në deklaratë shtohej se të dy udhëheqësit ranë dakord mbi “domosdoshmërinë e prioritizimit të dialogut” në zgjidhjen e mosmarrëveshjeve rajonale, me al-Sharaa që theksoi se “diplomacia aktive është e vetmja mënyrë për të kapërcyer krizat e zgjatura të rajonit”.

Nga ana e tij, Trump shprehu mbështetje për “aspiratat e popullit sirian për të ndërtuar një shtet të bashkuar dhe të fortë” dhe përshëndeti marrëveshjen e armëpushimit, duke e përshkruar atë si “një hap të rëndësishëm drejt përfundimit të konfliktit”.

Ai gjithashtu vlerësoi mirëkuptimet që lidhen me “integrimin e forcave ushtarake, përfshirë SDF-në, në institucionet zyrtare shtetërore”.

Në frontin ekonomik, Trump shprehu gatishmërinë e Uashingtonit për të mbështetur përpjekjet e rindërtimit të Sirisë “duke inkurajuar investimet dhe duke krijuar një mjedis tërheqës për kapitalin”, duke theksuar se stabiliteti ekonomik i Sirisë është “një gur themeli i stabilitetit në Lindjen e Mesme”, thuhet në deklaratë.

Më parë, Trump tha se pati një bisedë “të shkëlqyer” me homologun e tij sirian.

“Pata një bisedë të shkëlqyer me presidentin shumë të respektuar të Sirisë”, u tha Trump gazetarëve përpara se të nisej për në shtetin e Ajovës.

Trump tha se të gjitha gjërat që kanë të bëjnë me Sirinë dhe atë zonë po “po funksionojnë shumë, shumë mirë”.

“Pra, jemi shumë të lumtur për këtë,” shtoi ai.