Presidenti i SHBA-së, Donald Trump, njoftoi të mërkurën se Uashingtoni kishte arritur një marrëveshje tregtare “të plotë” me Seulin, duke vendosur tarifa të përgjithshme për eksportet e vendit në SHBA në 15%.

Kjo marrëveshje do të thotë që detyrimet do të ulen nga 25% që Trump kishte kërcënuar në “letrën e tij tarifore” drejtuar Seulit në fillim të këtij muaji.

Trump tha gjithashtu në një postim në platformën e mediave sociale Truth Social se Koreja e Jugut do t’u “dhurojë Shteteve të Bashkuara 350 miliardë dollarë për investime në pronësi dhe të kontrolluara nga Shtetet e Bashkuara, të zgjedhura nga unë, si President”.

Presidenti i Koresë së Jugut, Lee Jae-myung, tha në një postim në Facebook se vendi i tij kishte përfunduar negociatat e tarifave me Shtetet e Bashkuara pasi “mblodhën opinione të ndryshme dhe rafinuan strategjitë tona”, sipas një përkthimi në Google të deklaratës së tij në gjuhën koreane.

Lee tha se fondi prej 350 miliardë dollarësh “do të luajë një rol në lehtësimin e hyrjes aktive të kompanive koreane në tregun amerikan në industri ku ne kemi pika të forta, të tilla si ndërtimi i anijeve, gjysmëpërçuesit, bateritë sekondare, bioteknologjia dhe energjia”.

Trump tha gjithashtu se si pjesë e marrëveshjes, Seuli do të blejë 100 miliardë dollarë LNG ose produkte të tjera energjie nga SHBA-të, duke shtuar se Seuli kishte rënë dakord gjithashtu të investonte “një shumë të madhe parash për qëllime investimi”, pa specifikuar shumën. Mallrat amerikane nuk do t’i nënshtrohen asnjë tarife, shtoi ai. Që nga viti 2024, norma efektive e tarifave të Koresë për mallrat e importuara nga SHBA-të ishte rreth 0.79%.

Lee tha në postimin e tij se “shpresoj që nëpërmjet kësaj, bashkëpunimi industrial midis Koresë dhe SHBA-së do të forcohet dhe aleanca midis Koresë dhe Amerikës gjithashtu do të forcohet”, por shtoi gjithashtu se Seuli do ta mbajë “diplomacinë e përqendruar në interesin kombëtar” si parimin e tij kryesor.

 

(A.A/BalkanWeb)