Donald Trump paralajmëroi Iranin se gjërat do të bëheshin “keq” nëse nuk do të kishte marrëveshje për programin e tij bërthamor, një ditë pasi Teherani njoftoi se i ishte përgjigjur letrës së presidentit amerikan që kërkonte bisedime.
Miliarderi republikan, i cili tërhoqi SHBA-në në vitin 2018 nga marrëveshja ndërkombëtare me Iranin gjatë mandatit të tij të parë dhe rivendosi sanksione të ashpra ekonomike kundër Republikës Islamike, tani thotë se është i hapur për dialog me Teheranin mbi mbikëqyrjen e aktiviteteve të tij bërthamore.
Trump, i cili kohët e fundit njoftoi se i kishte dërguar një letër Iranit, tha se preferonte një marrëveshje, por gjithashtu kërcënoi Teheranin në rast të dështimit.
“Preferenca ime… është që ne të mund të bëjmë një marrëveshje me Iranin,” tha presidenti republikan nga Zyra Ovale. “Por nëse nuk arrijmë të biem dakord, gjërat do të shkojnë keq” për Iranin, paralajmëroi ai.
Ministri i Jashtëm iranian Abbas Araghchi tha të enjten se vendi i tij i ishte përgjigjur letrës së presidentit amerikan, pa specifikuar përmbajtjen e saj.
(A.A/BalkanWeb)
