Tensionet e reja në marrëdhëniet SHBA – Iran janë nxitur nga deklaratat e Donald Trump , i cili tha se forca të konsiderueshme ushtarake amerikane po lëviznin drejt rajonit të Republikës Islamike, ndërsa Uashingtoni po monitoronte nga afër zhvillimet në Teheran.
Duke folur me gazetarët në aeroplanin presidencial, presidenti amerikan tha se ende po “peshonte opsionet e tij” në lidhje me Iranin, duke vënë në dukje se Uashingtoni ishte në gatishmëri të shtuar.
Sipas tij, një “forcë e madhe” e ushtrisë amerikane po lëvizte drejt rajonit, megjithatë pa dhënë detaje të mëtejshme mbi natyrën ose fushëveprimin e vendosjes.
Deklaratat e Trump vijnë në një kohë tensionesh të larta, pas protestave masive në disa qytete iraniane dhe shtypjes së tyre të përgjakshme nga autoritetet.
Uashingtoni dhe Teherani kanë shkëmbyer kërcënime kohët e fundit, me zhvillimet brenda Iranit që kanë rritur shqetësimet për destabilizim të mëtejshëm në rajon.
