Sekretari i Shtetit i SHBA-së, Marco Rubio deklaroi i vendosur se Ngushtica e Hormuzit do të rihapet “në një mënyrë ose në një tjetër” kur të përfundojë operacioni ushtarak në Iran, me pëlqimin e Iranit ose përmes një koalicioni ushtarak ndërkombëtar që përfshin Shtetet e Bashkuara të Amerikës.

“Qëllimet tona në Iran janë të qarta dhe do t’i arrijmë ato brenda javësh, jo muajsh. Nëse Irani vendos të mbyllë Ngushticën e Hormuzit pas përfundimit të operacionit ushtarak, do të përballet me pasoja serioze”, tha Rubio në një intervistë me Al Jazeera.

Ai tha gjithashtu se Presidenti i SHBA-së, Donald Trump, “preferon diplomacinë në zgjidhjen e konfliktit me Iranin”.

“Ka mesazhe dhe bisedime të drejtpërdrejta midis Iranit dhe Shteteve të Bashkuara të Amerikës, kryesisht përmes ndërmjetësve. Presidenti Trump gjithmonë preferon diplomacinë dhe gjithmonë përpiqet për rezultate. Regjimi iranian ka vendosur të shpenzojë pasurinë e vendit të tij për të mbështetur Hezbollahun, Hamasin dhe milicitë shiite në Irak dhe për të kërcënuar në mënyrë të panevojshme fqinjët e tij. Ne gjithmonë do të mirëprisnim një Iran të udhëhequr nga njerëz me një vizion të ndryshëm për të ardhmen, dhe nëse lind një mundësi e tillë, ne do ta shfrytëzojmë atë”, tha Rubio.