Presidenti i Shteteve të Bashkuara të Amerikës, Donald Trump, ka sugjeruar ndryshimin e emrit të Oqeanit Atlantik ose Oqeanit Paqësor, duke propozuar si mundësi emërtimet “Oqeani Trump” ose “Oqeani i Amerikave”, raportoi “Washington Post”.
Gjatë një tubimi elektoral të shtunën, në Clarksville, Tenesi, Trump u tha mbështetësve se, pas ndryshimeve të mëparshme të emrave të disa hapësirave ujore, do të duhej të kishte edhe një oqean dhe një lumë me emër të ri.
“Kemi Gjirin, kemi një liqen të bukur. Dikush tha se na duhet një lumë. Na duhet një lumë dhe na duhet një oqean”, tha Trump, duke shtuar se po mendonte për Oqeanin Atlantik ose Oqeanin Paqësor.
“Do ta quajmë ‘Oqeani Trump’ ose ‘Oqeani i Amerikave’, diçka e tillë”, u shpreh ai, duke shkaktuar të qeshura dhe duartrokitje nga të pranishmit.
Trump nuk përcaktoi se cilin prej dy oqeaneve synonte të riemërtonte dhe nuk njoftoi ndonjë vendim apo akt zyrtar për këtë çështje.
Propozimi vjen pas nismave të mëparshme të administratës Trump për të ndryshuar emërtimet e disa hapësirave gjeografike.
Në janar 2025, Trump nënshkroi një urdhër ekzekutiv për përdorimin e emrit “Gjiri i Amerikës” në vend të “Gjirit të Meksikës” në emërtimet zyrtare të administratës federale amerikane.
Në gusht 2026, ai ndërmori gjithashtu një nismë për riemërtimin e Liqenit Ontario si “Liqeni i Amerikës”.
Gjatë fjalimit në Tenesi, presidenti amerikan përmendi edhe mundësinë e ndryshimit të emrit të një lumi, por përjashtoi lumin Hadson dhe lumin Misisipi.
Për lumin Hadson, ai vlerësoi kontributin historik të eksploruesit Henry Hudson, ndërsa për Misisipin tha se nuk dëshironte t’ia ndryshonte emrin, duke përmendur mbështetjen e madhe që kishte marrë në atë shtet.
Qeveria amerikane mund të vendosë se cilat emërtime përdoren në hartat dhe dokumentet zyrtare të administratës federale.
Megjithatë, një vendim i tillë nuk do t’i detyronte automatikisht shtetet e tjera apo institucionet ndërkombëtare të përdornin të njëjtin emër.
Oqeani Atlantik dhe Oqeani Paqësor janë hapësira ujore ndërkombëtare, që shtrihen përtej juridiksionit të një shteti të vetëm.
Për këtë arsye, ndryshimi i emrit të tyre në nivel ndërkombëtar, do të ishte shumë më kompleks sesa miratimi i një emërtimi të ri për përdorim të brendshëm në SHBA.
Deri më tani, sugjerimi i Trump mbetet një deklaratë e bërë gjatë një tubimi politik dhe nuk përbën një vendim zyrtar për ndryshimin e emrit të ndonjërit prej dy oqeaneve.
