Presidenti i SHBA-së, Donald Trump, tha të martën se Rusia ka “10 ditë nga sot” për t’i dhënë fund luftës së saj në Ukrainë, ose do të përballet me sanksione të SHBA-së.
Trump ia paraqiti afatin e tij të ri Kremlinit ndërsa iu drejtua gazetarëve në bordin e Air Force One, duke thënë: “Do të vendosim tarifa e gjëra të tjera” nëse Moska nuk e ndal luftën.
“Nuk e di nëse kjo do ta ndikojë Rusinë, sepse ai, padyshim, ndoshta dëshiron ta vazhdojë luftën, por ne do të vendosim tarifa dhe gjëra të ndryshme që ju vendosni, kjo mund t’i ndikojë ose jo”, tha Trump në një referencë të dukshme ndaj Presidentit rus Vladimir Putin .
Të hënën, Trump kërcënoi Rusinë me sanksione dhe tarifa dytësore, ose tarifa ndaj partnerëve tregtarë rusë, nëse ajo nuk i jep fund luftës në Ukrainë brenda “rreth 10 ose 12 ditësh”, shumë më herët se një afat i mëparshëm prej 50 ditësh. Por komentet e tij të martën e shtynë afatin e tij, duke i dhënë Kremlinit deri më 8 gusht për të ndërmarrë veprime.
Afati i tij i mëparshëm prej 50 ditësh do të kishte rënë në fillim të shtatorit.
Përpara takimit të tij me kryeministrin e Mbretërisë së Bashkuar, Keir Starmer, Trump tha se është “shumë i zhgënjyer” me Putinin, sepse presidenti rus “del dhe fillon të lëshojë raketa në një qytet si Kievi dhe vret shumë njerëz në një azil pleqsh apo kudo tjetër”.
“Do të duhet ta shqyrtojmë. Do t’i zvogëloj 50 ditët që i dhashë për armëpushim me Ukrainën në një numër më të vogël, sepse mendoj se e di tashmë përgjigjen”, shtoi ai.
(A.A/BalkanWeb)
