Turqia dhe Katari kanë propozuar një alternativë për çarmatosjen e organizatës rebele të Hamasit me qëllimin kufizimin e saj në Rripin e Gazës.

Sipas burimeve izraelite, ka një plan midis këtyre dy vendeve, i cili parashikon transferimin e armëve të Hamasit në një Autoritet Palestinez që do të administrojë Gazën, ose ruajtjen e tyre nën mbikëqyrje ndërkombëtare.

Megjithatë, Izraeli e refuzon afatin dyvjeçar të kërkuar nga Katari dhe Turqia për çarmatosjen e organizatës, duke insistuar për një periudhë shumë më të shkurtër, vetëm disa muaj.

Burimet e njëjta shtojnë se Tel Avivi kundërshton fuqishëm pjesëmarrjen e forcave turke në një forcë ndërkombëtare stabilizimi në Gazë, duke zbuluar gjithashtu se po shqyrton mundësinë e krijimit të një “modeli politik pa Hamasin” në Rafah.

Sipas vlerësimeve të shërbimit izraelit të inteligjencës, 75% e banorëve të Gazës nuk e mbështesin më Hamasin.

Megjithatë, këto burime paralajmërojnë se organizata po rindërton forcat e saj dhe synon të rifitojë kontrollin e plotë mbi Rripin e Gazës, duke shfrytëzuar boshllëkun e sigurisë që krijon armëpushimi i brishtë.

Funksionarët izraelitë theksuan nevojën për një plan operativ të pavarur për çarmatosjen nga ana e Izraelit, pa u mbështetur në iniciativa amerikane ose ndërkombëtare që mund të jenë “të buta” ndaj Hamasit.

Ditën e shtunë, lideri i Hamasit në Gazë, Khalil al-Hiyah, deklaroi se organizata është e gatshme të dorëzojë armët e saj në “shtetin” që do të udhëheqë zonën në të ardhmen, me kushtin që të përfundojë “pushtimi” izraelit.

Në një deklaratë për mediat, ai theksoi se “armët e Hamasit janë të lidhura me ekzistencën e pushtimit dhe agresionit; nëse ky përfundon, armët do t’i kalojnë shtetit”.

Zyra e tij sqaroi se ai e kishte fjalën për “një shtet të ardhshëm dhe të pavarur palestinez”, sipas AFP.