Ministri i Jashtëm turk, Hakan Fidan, deklaroi sot për Reuters se Turqia dhe Shtetet e Bashkuara duhet të gjejnë një mënyrë për të hequr sanksionet amerikane sipas ligjit CAATSA “shumë shpejt”, duke shtuar se aleatët e NATO-s po punojnë aktualisht për këtë çështje.

Shtetet e Bashkuara e hoqën Turqinë nga programi i avionëve luftarakë F-35 dhe vendosën sanksione në vitin 2020 pas blerjes nga Ankaraja të sistemit rus të mbrojtjes ajrore S-400. Turqia ka konsideruar këtë vendim si të pajustifikuar dhe shpreson që të kapërcehet gjatë mandatit të dytë të administratës amerikane.

Në një intervistë gjatë Forumit në Doha të Katarit, Fidan komentoi gjithashtu se plani 28-pikësh i Uashingtonit për përfundimin e luftës në Ukrainë, i kritikuar nga Kievi dhe disa vende evropiane, është vetëm një “pikënisje” dhe po zhvillohet tani në një kornizë të re diplomatike.