Rruga e re kombëtare Qukës–Qafë Plloçë, e inauguruar nga kryeministri Edi Rama dhe ministrja e Infrastrukturës, Belinda Balluku më 5 shtator të këtij viti, po tregon tashmë dobësitë e saj infrastrukturore.
Vetëm pak javë pas hapjes, aksi po përballet me probleme serioze si pasojë e reshjeve të shiut që kanë përfshirë juglindjen e vendit.
Sot, një pjesë e masivit shkëmbor në këtë aks ka pësuar rrëshqitje, duke bllokuar një nga tre korsitë e rrugës. Rrëshqitjet e dheut vazhdojnë edhe në këto momente, ndërsa drejtuesit e automjeteve këshillohen të tregojnë kujdes të shtuar gjatë kalimit.
Problemet e vazhdueshme me akset e reja rrugore, të sapo përfunduara – ngrenë dyshime për cilësinë dhe menaxhimin e investimeve në infrastrukturën kombëtare.
Rrugët e reja që u ‘premtuan’ se do të përmirësonin qarkullimin dhe sigurinë e qytetarëve duket se vetëm pak javë pas inaugurimit, nuk arrijnë të përballojnë kushtet elementare të motit.
