Gazetari amerikan Terry Anderson, i cili u mbajt peng për gati 7 vite gjatë luftës civile në Liban, ka ndërruar jetë në moshën 76-vjeçare. Anderson ishte korrespondenti kryesor për Lindjen e Mesme për Associated Press kur u kap nga militantët islamikë në vitin 1985 gjatë asaj që u bë e njohur si kriza e pengjeve në Liban. Mësohet se ai ndërroi jetë në shtëpinë e tij në Greenwood Lake, Nju Jork, të dielën. Lajmi u konfirmua nga vajza e tij.

“Asnjëherë nuk i pëlqente të quhej hero, diçka që të gjithë këmbëngulën ta quanin. Megjithëse jeta e babait tim u karakterizua nga vuajtje ekstreme gjatë kohës së tij si peng në robëri, ai gjeti një paqe të qetë dhe të rehatshme vitet e fundit”, tha ajo. Louis Boccardi, i cili drejtonte Associated Press gjatë robërisë së Anderson, ishte ndër ata që e kujtuan atë si një “hero”.

Anderson u rrëmbye në Bejrut më 16 mars 1985. Ai sapo kishte mbaruar së luajturi tenis kur persona të armatosur e tërhoqën zvarrë në një makinë dhe u larguan me shpejtësi. Gazetari do t’i kalonte gjashtë vitet e nëntë muajt e ardhshëm i bllokuar në qeli nëntokësore, i lidhur me zinxhirë dhe me sy të lidhur për pjesën më të madhe të kohës, si një nga më shumë se 100 personat e ndaluar në Liban. Motra e tij Peggy Say, e cila vdiq në vitin 2015, mbrojti ashpër lirimin e vëllait të saj dhe shokëve të tij robër.

Ai u lirua përfundimisht në 1991 pasi lufta civile përfundoi. Gazetari u takua me vajzën e tij, e cila lindi menjëherë pas rrëmbimit të tij, për herë të parë kur ajo ishte gjashtë vjeçe. Pas lirimit të tij, Anderson ligjëroi rreth gazetarisë në kolegje të ndryshme amerikane, përfshirë Universitetin Columbia në Nju Jork, përpara se të pensionohej në vitin 2015. Ai shkroi gjithashtu një autobiografi, “Den of Lions”, duke detajuar kohën e tij në robëri.
(BalkanWeb)