Njëqind nxënës të një shkolle katolike në Nigerinë perëndimore, të rrëmbyer më 21 nëntor nga persona të armatosur të paidentifikuar, janë liruar. Lajmi u konfirmua nga një burim i Kombeve të Bashkuara dhe nga presidenca nigeriane, pa dhënë detaje mbi rrethanat e lirimit apo identitetin e rrëmbyesve.

Nxënësit, të cilët i përkisnin Shkollës Katolike të Shën Marisë në Papiri, shteti Niger, pritet t’u dorëzohen autoriteteve lokale ditën e hënë, sipas burimit të OKB-së.

Rrëmbyerjet masive të studentëve dhe fëmijëve nga grupe të armatosura janë bërë një fenomen i përsëritur në disa rajone të Nigerisë, ku bandat kriminale kërkojnë shpesh shpërblime për lirimin e pengjeve. Autoritetet ende nuk kanë dhënë informacione mbi operacionin që solli lirimin e nxënësve.