UEFA kishte përalajmëruar ndërsa sot është marrë vendimi përfundimtar. Nga sezoni 2018/2019 në kompeticionin më të rëndësishëm për klube në kontinentin e vjetër, “Uefa Champions League”, shtete si Spanja, Gjermania Anglia dhe Italia do kenë mundësinë të dërgojnë nga 4 skuadra.
Sipas rregullores së re që do të hyjë në fuqi në vitin 2018, katër vendet e para në listën e UEFA-s kanë të garantuara secila nga 4 skuadra në gazën në grupe të Ligës së Kampioneve, ndërsa vendet 5 dhe 6 kanë nga dy skuadra të garantuara në fazën në grupe, me 1 të tretë që do të shkojë në kualifikuese.
Kësisoj, faza e grupeve e Ligës së Kampioneve 2018-2019 sheh si protagoniste 4 skuadra nga La Liga, Bundesliga, Premier Liga dhe Serie A. Kampionati francez dhe ai rus do të kenë nga dy klube në fazën në grupe, me të tretin në kualifikuese.
Ndërkohë, kampionatet nga vendet 7 deri në 10, kanë vetëm nga një skuadër të garantuar në fazën në grupe dhe një tjetër në kualifikuese. Këto pozicione mbahen nga Portugalia, Ukraina, Belgjika dhe Turqia.
Republika Çeke dhe Zvicra, përkatësisht në vendet 11 dhe 12, shohin ekipet e tyre kampione të marrin pjesë në play-off, ndërsa kanë të sigurt të paktën një pjesëmarrës direkt në fazën në grupe të Ligës së Europës.
(e.k/BalkanWeb)
