Ukraina është duke pritur për detaje të mëtejshme mbi pajisjet ushtarake amerikane me vlerë “miliarda dollarë” të premtuara nga Donald Trump të hënën, mes konfuzionit se sa sisteme të mbrojtjes ajrore Patriot do të dërgohen në Kiev.
Në një takim në Shtëpinë e Bardhë me sekretarin e përgjithshëm të NATO-s, Mark Rutte, të hënën, Trump tha se një vend i paidentifikuar ishte gati të siguronte menjëherë “17 Patriot” ndërsa tha se ishte rënë dakord për një “marrëveshje shumë të madhe” që aleatët evropianë të blinin armë nga Shtetet e Bashkuara dhe më pas t’i dërgonin ato në Ukrainë.
Aktualisht besohet se Ukraina ka vetëm gjashtë bateri mbrojtëse ajrore Patriot në funksionim, të cilat mund të kapin raketat ruse kruiz dhe balistike që lëvizin me shpejtësi.
Gjeneral Major Vadym Skibitskyi , zëvendësdrejtori i agjencisë së inteligjencës ushtarake të Ukrainës, HUR, tha se nuk ishte e qartë se çfarë donte të thoshte presidenti amerikan. “Nuk e dimë saktësisht”, tha ai, duke shtuar se Ukraina ishte mirënjohëse për ndihmën dhe kishte reaguar “pozitivisht” ndaj njoftimit të Shtëpisë së Bardhë.
Gjenerali konfirmoi gjithashtu se Trump dhe presidenti ukrainas, Volodomyr Zelensky, kishin diskutuar mundësinë e furnizimit të SHBA-së me raketa Tomahawk me rreze të gjatë veprimi në një telefonatë më herët në korrik, por nuk ishte arritur asnjë marrëveshje.
Skibitskyi tha se Trump në komentet e tij mbi raketat Patriot mund të ketë pasur parasysh raketat interceptuese, stacionet e lëshimit ose bateritë e tëra që përbëhen nga lëshues të shumtë dhe sisteme radarësh dhe kontrolli, të cilat kushtojnë më shumë se një miliard dollarë secila. “Shtatëmbëdhjetë është një numër i madh nëse flasim për bateri. Nëse janë lëshues, kjo është e mundur”, shtoi ai.
Çdo sistem Patriot vjen me gjashtë lançues. Gjermania ka rënë dakord të ofrojë dy sisteme Patriot, ndërsa Holanda do të dhurojë një të tretë, tha Skibitskyi. “Këto do të ishin 18 lançues për tre bateri, që është afër 17. Administrata amerikane dhe Pentagoni do të na japin detaje të mëtejshme”, shtoi ai.
Mundësia që SHBA-të t’i ofrojnë Ukrainës raketa Tomahawk me rreze të gjatë veprimi, siç u diskutua nga Trump dhe Zelensky këtë muaj, ka të ngjarë ta zemërojë Vladimir Putinin. Raketat me precizion të lartë janë të afta të godasin Moskën dhe kanë një rreze veprimi prej 1,600 km. Kërkesat e mëparshme të Ukrainës u refuzuan nga administrata Biden.
Gjatë një telefonate më 4 korrik, Trump e pyeti Zelensky-n nëse mund të godiste kryeqytetin rus dhe Shën Petersburgun. Sipas Skibitskyi-t, Zelenskyy u përgjigj: “Po, absolutisht. Mundemi nëse na jepni armët”. Trump të martën tha se Ukraina nuk duhet ta shënjestrojë Moskën.
Administrata Trump deri më tani nuk ka rënë dakord të dërgojë raketa Tomahawk. Nëse do t’i siguronte armët, Ukraina do të kishte vështirësi në vendosjen e tyre, tha Skibitskyi. “Ato nuk janë të lehta për t’u përdorur. Lëshuesit kryesorë janë anije luftarake ose bombardues strategjikë. Ne nuk kemi asnjë avion bombardues strategjik”, pranoi ai.
Por ai tha se ishte thelbësore që Ukraina të kishte aftësinë për të kryer sulme “kinetike” thellë brenda Rusisë kundër objektivave ushtarake me vlerë të lartë. Diskutimet ishin në vazhdim me Uashingtonin mbi heqjen e kufizimeve të vendosura nga administrata e kaluar për përdorimin e Atacam-ëve, SHBA-të ofruan raketa me një rreze veprimi prej 300 km – rreth 190 milje.
Gazeta Washington Post raportoi të martën se administrata Trump ka të ngjarë të lejojë që raketat Atacam të përdoren brenda Rusisë me gamën e tyre të plotë dhe po shqyrton dërgimin e raketave shtesë. Aktualisht, ato mund të qëllohen vetëm në zonat e pushtuara nga Rusia në Ukrainë dhe jo në territorin rus.
Skibitskyi tha se Kremlini i kishte zhvendosur tashmë bazat e tij strategjike ushtarake më shumë se 500 km nga kufiri i tij me Ukrainën. Kievi ishte në gjendje t’i godiste ato vetëm duke përdorur dronë kamikazë pa pilot të cilët mund të mbajnë 5 kg eksploziv. Atakamet, në të kundërt, kanë një ngarkesë prej 500 kg dhe mund të shkaktojnë shkatërrime më të mëdha.
«Është shumë e rëndësishme për ne të marrim miratimin nga SHBA-të për të përdorur raketa me rreze të gjatë veprimi», tha ai. «Ne duam të shkatërrojmë dhe të prishim, në përputhje me procedurën e NATO-s ».
Zelenskyy tha se pati një “bisedë vërtet të mirë” me Trump pas njoftimit të së hënës për një paketë të madhe armësh. Ai tha se diskutoi me presidentin e SHBA-së se si të arrihet “një paqe e qëndrueshme dhe e drejtë” dhe të ndalet bombardimi rus i qyteteve ukrainase, të cilat janë goditur javët e fundit nga qindra dronë dhe raketa.
Danimarka, Suedia dhe Holanda thanë të martën se donin të merrnin pjesë në planin e Trump që Evropa të blejë armë amerikane për Ukrainën.
Politikanët në Kiev e kanë mirëpritur gjerësisht përmirësimin e marrëdhënieve me SHBA-në, pas takimit katastrofik të Zelenskyy-t në Shtëpinë e Bardhë me Trump në shkurt. Por pati edhe zhgënjim që tarifat dhe sanksionet dytësore të SHBA-së ndaj Rusisë janë shtyrë përsëri, me Trump që vendosi një afat prej 50 ditësh.
Në një intervistë me BBC-në, Trump tha se ishte “i zhgënjyer, por jo i mbaruar” me Putinin.
Zyrtarët rusë e kanë hedhur poshtë kërcënimin e Trump si “fjalë të nxehta”, duke theksuar se ai ka ndryshuar mendje disa herë për sanksionet dhe çështje të tjera. “Trump i lëshoi një ultimatum teatral Kremlinit. Bota u drodh, duke pritur pasojat… Rusisë nuk i interesonte”, shkroi ish-presidenti Dmitry Medvedev në X.
I dërguari i Trump në Ukrainë, gjenerali Keith Kellogg, ndodhet në Kiev për një vizitë njëjavore. Të hënën ai u takua me Zelensky dhe komandantin e përgjithshëm gjeneral Oleksandr Syrskyi, si dhe me Kyrylo Budanov, shefin e inteligjencës ushtarake të Ukrainës dhe Skibitskyi. Kellogg u informua mbi planet ruse për një ofensivë verore dhe mbi të rejat e fundit nga vija e frontit në lindje, ku trupat ruse po përparojnë.
Skibitskyi tha se presidenti amerikan kishte njerëz “më me përvojë” përreth tij sesa në mandatin e tij të parë presidencial dhe nuk u soll si një politikan “klasik”. “Ai është më shumë një biznesmen. Nuk është e lehtë ta kuptosh zotin Trump”, shtoi Skibitskyi.
(A.A/BalkanWeb)
