Drejtoresha Ekzekutive e Fondit të OKB-së për Fëmijë (UNICEF), Catherine Russell, paralajmëroi të mërkurën se ndihma e kufizuar që arrin në Rripin e Gazës nuk është aspak e mjaftueshme për nevojat e fëmijëve që përballen me një krizë humanitare në thellim .
“Fëmijët në Gaza vazhdojnë të vriten, të plagosen dhe të privohen nga ndihma. Kamionët e paktë që kanë hyrë me furnizime shpëtimtare nuk janë aspak të mjaftueshëm dhe ende nuk kanë arritur tek ata që kanë nevojë urgjente”, shkroi Russell në X.
Duke theksuar pakësimin e shpejtë të furnizimeve në enklavë, shefi i UNICEF-it tha: “Po na mbarojnë furnizimet brenda Gazës dhe po na mbaron koha”.
Komentet e Russell vijnë pasi zyra e OKB-së për çështjet humanitare tha të martën se Izraeli miratoi hyrjen e rreth 100 kamionëve që transportonin ndihma në Gaza, një rritje e konsiderueshme nga nëntë të bllokuarit një ditë më parë, por ende shumë më pak se sa nevojitet për popullsinë e Gazës, e cila përballet me kushte pothuajse të urisë, sipas grupeve të ndihmës dhe organizatave ndërkombëtare.
Sipas zëdhënësit të OKB-së, Stephane Dujarric , asnjë nga furnizimet humanitare që kaluan në enklavë nuk ishte në gjendje të largohej nga zona e ngarkimit në Kareem Shalom për t’u shpërndarë, sepse autoritetet izraelite kishin lejuar vetëm një rrugë “shumë të mbingarkuar” dhe “të pasigurt”.
Që nga 2 marsi, Izraeli ka mbajtur një bllokadë të rreptë në Gaza, duke mohuar hyrjen e ndihmës humanitare dhe duke e shtyrë territorin drejt urisë, e cila tashmë ka marrë shumë jetë njerëzish.
Duke refuzuar thirrjet ndërkombëtare për armëpushim, ushtria izraelite ka ndërmarrë një ofensivë brutale kundër Gazës që nga tetori i vitit 2023, duke vrarë gati 53,700 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhër-arreste nëntorin e kaluar për Netanyahun dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
(A.A/BalkanWeb)
