Një ngjarje e rëndë ndodhi rreth mesnatës së 9 qershorit në zonën e Currilave në Durrës, ku një mjet “Range Rover” hyri kundravajtje dhe pasi policët i bënë shenjë të ndalojë, drejtuesi i mjetit nuk u bind, por i dha gaz makinës, duke rrezikuar jetën e efektivëve. Njëri prej policëve tentoi ta ndalonte me forcë mjetin luksoz, por shoferi vazhdoi rrugën, duke e tërhequr zvarrë efektivin për më shumë se 50 metra.

Pas “luftës’ në rrugë me efektivët, drejtuesi i mjetit u vu në pranga disa minuta më vonë, ndërsa polici i plagosur u dërgua me urgjencë në Spitalin e Traumës në Tiranë, pasi kishte marrë plagë të rënda në fytyrë. Ngjarje të tilla të rënda janë përsëritur së fundi në vendin tonë, siç ishte dhe rasti te “Rruga e Kavajës”, ku mjeti luksoz përplasi te vizat e bardha çiftin Konomi me fëmijën e tyre të porsalindur, e ndërsa shoferë rezultojnë të jenë emra jo të panjohur për drejtësinë.

Në rastin e Durrësit, në timonin e mjetit “Range Rover” ishte shtetasi Hysen Pici, i cili dyshohej se kishte në makinë edhe një emër shumë të njohur për drejtësinë shqiptare, Aldo Avdylaj, person i skeduar për precedentë penalë dhe i konsideruar i rrezikshëm.

Ajo që tërheq më shumë vëmendje është vendimi i Prokurorisë së Durrësit, e cila nuk e ka konsideruar ngjarjen të rëndë, ndonëse jeta e policit ishte në rrezik. Jo për faktin se Prokuroria e Durrësit ka vendosur të ngrejë ndaj Hysen Picin akuza të lehta, si “kundërshtim të punonjësve të policisë” dhe “drejtim të mjetit në mënyrë të parregullt”, akuza që zakonisht rëndojnë mbi drejtuesit e mjeteve, që refuzojnë të bëjnë testin e alkoolit, apo për ata që kryejnë shkelje të thjeshta mosbindjeje ndaj punonjësve të policisë.

Në fakt, në rastin konkret nuk kishim të bënim aspak me ngjarje të tilla të lehta, pasi shtetasi Hysni Pici rrezikoi seriozisht jetën e policit, i cili përfundoi te Trauma nga plagët e rënda, ku u vizitua në spital edhe nga zëvendësdrejtori i Përgjithshëm i Policisë së Shtetit Drejtues i Lartë Albert Dervishaj, së bashku me Drejtorin e Drejtorisë Vendore të Policisë Durrës Drejtues i Parë Neritan Nallbati.

Aktualisht efektivi i policisë është në shtëpi, ku vazhdon të marrë mjekim, ndërsa ka mësuar se personi i armatosur dhe që e tërhoqi zvarrë me Range Rover, sot ka përfituar një akuzë të lehtë nga prokuroria e Durrësit.

Kush janë Avdylajt e Shijakut?

Grupi “Avdyli” është ndër më të njohurit në vend, pasi anëtarët e kësaj bande akuzohen për vepra shumë të rënda kriminale, që nga vrasjet, prostitucioni, trafiku i drogës dhe vepra të tjera penale.

Rruga kriminale e Avdylajve nisi në vitin 1996, kur u vra me armë zjarri Dritan Avdyli, kushëriri i parë i Astrit Avdylit, kokës së bandës. Ai i kishte vendosur një gjobë biznesmenit Tefik Hyka, pronari i fabrikës së tullave në Vlorë.

Dritan Avdyli u telefonua nga një bashkëpunëtor shijakas i Tefik Hykës për të shkuar në zonën e “Katër Rrugëve të Shijakut” për të marrë paratë që i kishte kërkuar Tefikut, por në momentin që bashkë me shokun arrin në lokal goditet me një breshëri plumbash nga një vrasës me pagesë i ardhur nga Tirana, Durim Kusi.

Astrit Avdyli, djali i xhaxhit të Dritanit, i dënuar më parë për prostitucion në Itali merr hak duke vrarë në qendër të Shijakut personin që nxori në pritë Dritanin (lexo më poshtë daljen e parakohshme të Astrit Avdylit nga burgu.) Ndërkohë që spiralja e hakmarrjes nuk u ndal me kaq, pasi vëllai i Astritit, Shkëlqimi vrau në Tiranë, Durim Kusin.

Ndërkohë që Jasmin Avdyli është dënuar më parë në Itali, pasi u përfshi në vrasjen e një marshalli italian. Ai kishte disa vite që ishte liruar nga burgu dhe jetonte në Shijak.

Ndërsa, Flamur Avdyli prej vitit 1996 ka emigruar në Gjermani, ku dyshohet se është përfshirë në trafikun e heroinës së bashku me vëllezërit e tij.

Anëtarët e kësaj bande kriminale rezultuan të përfshirë edhe në dosjen e bujshme “339” të vjedhjes së votave në Durrës. Bëhet fjalë për 45-vjeçarin Astrit Avdyli, i cili para se të shfaqte interes për ish-kryebashkiakun e Durrësit, Vangjush Dako, dhe procesin zgjedhor në këtë qark, kishte probleme të tjera me drejtësinë, pasi akuzohej nga Prokuroria e Krimeve të Rënda si kreu i grupit të organizuar në trafikun e drogës.

I dënuar me 16 vjet burg për një vrasje të ndodhur në vitin 1997, Avdyli ndërmori një betejë ligjore 10-vjeçare për lirim të parakohshëm nga burgu i Shënkollit, betejë që në fund e fitoi.

Dokumentet gjyqësore tregojnë se Astrit Avdyli u lirua pas 13 vitesh burg, pasi siguroi më parë një raport mjekësor që e diagnostikonte atë me “depresion endogjen me tentativa vetëvrasëse”. Ai doli nga burgu më 2 mars 2016, pasi Gjykata e Lartë urdhëroi lirimin e tij me argumentin se “qëndrimi në burg i rrezikonte jetën”.

Por, vetëm pak kohë pas lirimit nga burgu, ai u vendos nën hetim për përfshirje në trafikun e drogërave të forta. Krimet e Rënda përgjuan grupin kriminal për plot dy vite e gjysmë dhe në fund ngritën akuza për 44 persona të akuzuar për trafik ndërkombëtar droge, korrupsion, ushtrim ndikimi të paligjshëm apo falsifikime masive me pronat.

“Veprimtaria kriminale ishte me qendër dhe pikë grumbullimi në qytetin e Shijakut, me referentë kryesorë vëllezërit Avdyli…strumbullarë të furnizimit me drogëra të forta, kryesisht heroinë dhe kokainë në të gjithë territorin kombëtar”, thuhet në kërkesën e prokurorëve Dritan Prençi dhe Vladimir Mara.

(BalkanWeb)