Shefi ushtarak i Sudanit ka konfirmuar tërheqjen e ushtrisë nga bastioni i saj i fundit perëndimor, el-Fasher, pasi Forcat Paraushtarake të Mbështetjes së Shpejtë (RSF) shpallën kontrollin e qytetit.

Në një fjalim televiziv, Gjenerali Abdel Fattah al-Burhan tha se kishte miratuar tërheqjen në përgjigje të “shkatërrimit sistematik dhe vrasjes së civilëve”.

Ai tha se kishte rënë dakord me udhëheqësit lokalë që të “largoheshin dhe të shkonin në një vend të sigurt për të mbrojtur qytetarët e mbetur dhe pjesën tjetër të qytetit nga shkatërrimi”.
OKB-ja ka ngritur alarmin lidhur me raportet për mizoritë e kryera nga RSF-ja në ditët e fundit dhe ka bërë thirrje për kalim të sigurt për civilët e bllokuar.

RSF-ja ka mohuar akuzat se po vriste civilë.

Rënia e el-Fasher mund të shënojë një pikë kthese të rëndësishme në luftën civile të Sudanit, e cila ka vrarë dhjetëra mijëra njerëz dhe ka zhvendosur gati 12 milionë njerëz që nga prilli i vitit 2023.

Pushtimi i qytetit i jep RSF-së kontrollin mbi të pesë kryeqytetet shtetërore në Darfur, duke konsoliduar administratën e saj paralele në Nyala, kryeqytetin e Darfurit të Jugut.

Studiuesit në SHBA thonë se kanë gjetur prova të vrasjeve masive, pasi Forcat Paraushtarake të Mbështetjes së Shpejtë (RSF) morën kontrollin e qytetit el-Fasher nga ushtria sudaneze.

Laboratori i Kërkimeve Humanitare në Universitetin Yale thotë se imazhet satelitore tregojnë grupe të atyre që duket se janë trupa njerëzorë pranë automjeteve të RSF-së dhe një muri që rrethon qytetin.

Studiuesit thonë se imazhet konfirmojnë gjithashtu se RSF-ja ka kapur të gjitha pozicionet e ushtrisë.

Lufta civile ka vazhduar në Sudan prej dy vitesh e gjysmë tashmë. Është vlerësuar se të paktën 150,000 njerëz janë vrarë – përfshirë shumë civilë – dhe më shumë se 14 milionë njerëz janë detyruar të largohen nga shtëpitë e tyre.