Aldrich Ames, ish-agjent i kundërzbulimit të CIA-s dhe një nga spiunët më famëkeq në historinë e inteligjencës amerikane, ka vdekur në moshën 84-vjeçare, njoftuan autoritetet amerikane. Ames, i cili kishte shërbyer për më shumë se 30 vjet në Agjencinë Qendrore të Inteligjencës, po vuante një dënim me burgim të përjetshëm për spiunazh në favor të Bashkimit Sovjetik dhe më pas Rusisë.
Ai u dënua në vitin 1994 pasi u shpall fajtor për shitjen e informacioneve sekrete me vlerë mbi 2.5 milionë dollarë Moskës. Sipas Departamentit të Drejtësisë së SHBA-së, veprimet e tij rrezikuan dhjetëra operacione të fshehta dhe çuan në zbulimin dhe ekzekutimin e më shumë se një duzine agjentësh të dyfishtë që punonin për Shtetet e Bashkuara.
Ames dhe bashkëshortja e tij, Rosario, dyshohet se filluan të bashkëpunonin me shërbimet sovjetike që nga viti 1985. Stili i tyre i jetesës luksoze ngriti dyshime brenda komunitetit të inteligjencës, duke çuar në zbulimin e aktivitetit të tij në vitin 1994. Çifti u deklarua fajtor: Ames u dënua me burgim të përjetshëm pa mundësi lirimi me kusht, ndërsa Rosario Ames u dënua me mbi pesë vjet burg.
Në dëshminë e tij, Ames pranoi se për gati një dekadë kishte zbuluar identitetin e agjentëve perëndimorë që vepronin pas Perdes së Hekurt, duke marrë në këmbim një shpërblim prej 2.5 milionë dollarësh. Në një intervistë për Washington Post, dhënë një ditë para shpalljes së dënimit, ai tha se motivimi i tij kishte qenë “problemet e vazhdueshme financiare”.
Megjithëse pranoi “turp dhe faj të thellë” për tradhtinë, Ames minimizoi ndikimin e veprimeve të tij, duke deklaruar se nuk besonte se kishte dëmtuar ndjeshëm interesat e sigurisë së SHBA-së apo kishte ndihmuar realisht Moskën.
Sipas dosjeve të FBI-së, Ames punonte në seksionin e Bashkimit Sovjetik dhe Evropës Lindore në selinë e CIA-s në Langley, Virxhinia, kur kontaktoi për herë të parë KGB-në. Ai vazhdoi t’u dorëzonte sekrete sovjetikëve edhe gjatë shërbimit në Romë dhe pas kthimit në Uashington, në një periudhë kur inteligjenca amerikane po përpiqej të kuptonte pse kaq shumë operacione po dështonin.
Rasti i Ames u rikthye në vëmendjen publike në vitin 2018 me librin “Spiuni dhe Tradhtari” të Ben Macintyre, ku ai përmendet si personi që informoi Moskën për aktivitetet e kolonelit të KGB-së Oleg Gordievsky, një nga agjentët më të rëndësishëm të Perëndimit gjatë Luftës së Ftohtë.
