Hetuesit spanjollë thanë sot se kishin gjetur një pikturë të artistit britanik Francis Bacon, nëntë vjet pasi ishte vjedhur nga një apartament në Madrid.

“Piktura, me vlerë rreth 5 milionë euro (5,4 milionë dollarë), u gjet në një banesë në kryeqytetin spanjoll”, tha policia.

Vepra është një nga pesë portretet e bankierit spanjoll Jose Capelo nga Bacon, me një vlerë totale mbi 25 milionë euro (27 milionë dollarë), të vjedhura nga shtëpia e Capelo në Madrid në korrik 2015.

Hetuesit mundën të gjenin pikturën falë informacioneve të mbledhura pas arrestimit të dy personave të dyshuar në shkurt.

Policia tha se 16 persona janë arrestuar tani në lidhje me vjedhjen, duke përfshirë autorët e dyshuar më herët. Disa prej tyre kishin kontakte me grupet e krimit të organizuar në Evropën Lindore.

Hetimi do të vazhdojë deri në gjetjen e pikturës se pestë përfundimtare.

Bacon konsiderohet si një nga piktorët më të mëdhenj britanikë të kohëve të fundit, me disa nga veprat e tij ekspresioniste që kanë arritur shuma rekord në ankand.

Triptiku i tij “Three Studies of Lucian Freud” u shit për 142,4 milionë dollarë në ankand në Nju Jork në vitin 2013, duke e bërë atë një nga veprat më të shtrenjta në botë në atë kohë.

Bacon vizitonte shpesh Madridin, ku kalonte kohën duke studiuar pikturat e vjetra mjeshtërore në Muzeun Prado dhe vdiq në qytet në vitin 1992, në moshën 82-vjeçare.