Ashtu siç ishte paralajmëruar, opozita mbajti sot “Foltoren” e dytë para Kryeministrisë. PD dhe aleatët nisën të hënën e kaluar ciklin e protestave kundër qeverisë.
Tubimi i lajmëruar nisi në ora 18:00. Një foltore u improvizua para godinës së Këshillit të Ministrave në Bulevardin “Dëshmorët e Kombit”.
Duke e quajtur “Foltoren 2”, Berisha më herët u shpreh se qëllimi i saj nuk është vetëm shpëtimi i opozitës, por i Shqipërisë nga krimi dhe korrupsioni i qeverisë. Ai paralajmëroi se fundi i qeverisë do të vijë nga kjo betejë në shesh.
“Foltorja nuk ka mision të shpëtojë opozitën por ka mision të shpëtojë Shqipërinë nga krimi. Fundi i qeverisë do vijë nga ky shesh. Ne do vijojmë betejën tonë si misionarë dhe do vijojmë deri në largimin e tyre dhe rikthimin e votës së lirë të qytetarëve shqiptarë”, tha Berisha.
Në fokus të protestës së sotme vijojnë të jenë akuzat ndaj qeverisë për “heshtjen” e opozitës në parlament, korrupsionin si dhe mungesën e votës së lirë.
Për mbarëvajtjen e protestës, policia ka marrë masa duke rrethuar për mbrojtje godinën e Kryeministrisë, ndërsa rrugët që çojnë drejt Bulevardit “Dëshmorët e Kombit” janë kufizuar për qarkullim.
