Një stuhi e fuqishme goditi Spanjën, me rrugë që u shndërruan në lumenj, turistë të bllokuar në aeroporte dhe rrufe që detyruan njerëzit të vraponin për t’u shpëtuar.

Era e fortë dhe shirat e rrëmbyeshëm shkaktuan gjithashtu kaos në Majorka, ku fluturimet u anuluan dhe rrugët u bllokuan, ndërsa zona u godit nga uragani Melisa.

Meteocat, shërbimi meteorologjik i Katalonjës, vendosi Barcelonën në alarm portokalli, pasi qyteti u përfshi nga shira të rrëmbyeshëm, breshër dhe erëra të forta. Video tregojnë makina që përpiqen të kalojnë rrugët e përmbytura në Barcelonë, ku është dhënë paralajmërim për qëndrim në shtëpi.

Shërbimi i Mbrojtjes Civile të Katalonjës këshilloi qytetarët të mos dalin jashtë dhe të mos lëvizin gjatë reshjeve të forta. Stuhia shkaktoi probleme të mëdha në gjithë Katalonjën, përmbytje, rrëzime pemësh dhe anulime të linjave hekurudhore dhe fluturimeve, ndërsa mësimet në universitete u shtynë.

Shërbimi i Mbrojtjes Civile përfundoi paralajmërimin për përmbytje, por mbetet në gatishmëri për shkak të parashikimeve për reshje të mëtejshme të forta në veri-lindje të Katalonjës.
Autoritetet ripërsëritën thirrjet për kujdes gjatë udhëtimeve, aktiviteteve jashtë dhe në zonat e ndjeshme ndaj përmbytjeve.