MALLAKASTËR – Gjatë kontrolleve me objektiv parandalimin, evidentimin dhe goditjen e rasteve të kultivimit të bimëve narkotike, në Mallakastër janë zbuluar 31 bimë narkotike të kultivuara në një parcelë.
Në kuadër të planit operacional “Koordinata” është arrestuar në flagrancë kultivuesi i lëndës narkotike, Elidon Shehaj, 31 vjeç. Ai u prangos në flagrancë nga uniformat blu teksa po kujdesej për bimët e kanabisit.
Njoftimi i Policisë
Shërbimet e Komisariatit të Policisë Mallakastër, si rezultat i kontrolleve të kryera në kuadër të planit operacional “Koordinata”, goditën një tjetër rast të kultivimit të bimëve narkotike.
Nga kontrollet, në fshatin Bejar u konstatua një parcelë ku ishin kultivuar 31 bimë të dyshuara narkotike Cannabis Sativa, një pjesë e të cilave u sekuestrua me cilësinë e provës materiale, ndërsa pjesa tjetër u asgjësua nëpërmjet djegies.
Gjatë ndërhyrjes së Policisë, u kap në flagrancë, në parcelë, shtetasi E. Sh., 39 vjeç, i cili u arrestua për veprën penale “Kultivimi i bimëve narkotike”.
Plani operacional policor antikanabis “Koordinata” vijon intensivisht, në të gjithë territorin e qarkut Fier.
Materialet procedurale iu referuan Prokurorisë së Fierit, për veprime të mëtejshme.
(BalkanWeb)
