Autoritetet kineze kanë ekzekutuar katër anëtarë të familjes mafioze Bai, një nga klanet më famëkeqe që për vite me radhë drejtonte qendra mashtrimi dhe aktivitete kriminale në Myanmar, raportojnë mediat shtetërore kineze.

Ekzekutimet vijnë pas një vendimi të një gjykate në provincën Guangdong, e cila dënoi gjithsej 21 anëtarë dhe bashkëpunëtorë të familjes Bai për një sërë krimesh të rënda, përfshirë mashtrim, vrasje, plagosje dhe aktivitete të tjera kriminale.

Në nëntor të vitit të kaluar, gjykata kishte dhënë pesë dënime me vdekje, mes tyre edhe për patriarkun e klanit, Bai Suocheng. Ai ndërroi jetë nga një sëmundje pasi ishte dënuar, sipas raportimeve zyrtare.

Vetëm javën e kaluar, Kina ekzekutoi gjithashtu 11 anëtarë të mafias së familjes Ming, si pjesë e një fushate të gjerë shtetërore kundër rrjeteve të mashtrimit që veprojnë në Azinë Juglindore dhe që kanë viktimizuar mijëra qytetarë kinezë.