Gazetarja Klodiana Lala ka bërë deklarata të forta në emisionin “Kjo javë” në News24, ku foli për aktivitetin e një grupi kriminal në qytetin e Vlorës, që sipas saj konsiderohet ndër më të fuqishmit në zonë. Sipas Lalës, grupi i drejtuar nga Inez Hajrulla është shpallur në kërkim për dy vrasje, atë të Gentian Qarrit, si dhe për një plan për eliminimin e Bledar Birçajt. Ajo theksoi se nëse do të ketë hetime të plota, ky grup mund të rezultojë i përfshirë në ngjarje të tjera të rënda kriminale.
Gazetarja e vlerësoi si pozitiv ndërhyrjen e Policisë së Vlorës, duke kujtuar se qyteti ka përjetuar një seri vrasjesh mafioze dhe përplasje mes grupeve kriminale. Lala solli në vëmendje edhe disa mesazhe të publikuara në emisionin “Në shënjestër”, të shkëmbyera mes anëtarëve të grupit, përfshirë Mato Doshajn. Sipas saj, gjuha e përdorur në këto komunikime ishte tepër e rëndë, ndërsa vrasjet konsideroheshin me kode, ku eliminimi i një personi shënohej me “-1”.
Ajo shtoi se Hajrulla dyshohet të ketë bërë plane për vrasjen e Fatmir Hysenit dhe kërkonte vazhdimisht informacion për vendndodhjen e tij, si dhe për një tjetër person të lidhur me Amrando Sulejmanin, të cilin e konsideronte kundërshtar. Një tjetër detaj që tregonte nivel të lartë organizimi, sipas Lalës, ishte mënyra e sigurimit të banesave në zonën e Ujit të Ftohtë në Vlorë, ku raportohen kamera sigurie, dyer të blinduara dhe masa të forta mbrojtëse. Po ashtu, grupi dyshohet se kishte vendosur kamera sigurie edhe pranë lokalit të një prej objektivave të tyre, për të monitoruar lëvizjet.
Sipas gazetares, çdo person që dyshohej se bashkëpunonte me kundërshtarët e grupit, edhe nëse ishte i zakonshëm, mund të kthehej në shënjestër për eliminim. Lala ngriti dyshime se Inez Hajrulla mund të jetë fshehur në Greqi. Ajo përmendi si indicie një rast ku partnerja e tij ka raportuar humbjen e dokumenteve në shtetin grek, çka mund të jetë përdorur si alibi apo sinjal për vendndodhjen e tij. Ndërkohë, Mato Doshaj raportohet se është parë në Vlorë disa ditë para aksionit policor dhe dyshohet se mund të ketë pasur informacion paraprak për operacionin, pasi ende nuk është arrestuar.
“Grupi i Inez Hajrullës, është ndoshta grupi më i fuqishëm në Vlorë. Ai është shpallur në kërkim për dy vrasje, Gentian Qarrit dhe plan për të kryer vrasjen e Bledard Birçajt. Unë dyshoj që nëse do të ketë hetime të plota, grupi i tij ka ngjarje të rënda mbi supe. E kam parë pozitive fakti që u ndal Policia në Vlorë. Pati një seri vrasjesh mafioze në Vlorë dhe u hap sipari i asaj sage, përplasjesh mes grupimeve. Unë kam sjellë disa mesazhe në emisionin ‘Në shënjestër’, sms të shkëmbyera mes Mato Doshajt, me të tjerë, por gjuha e vulgut që përdornin, ishte e tmerrshme. Ata flisnin me gjuhë të tmerrshme për kundërshtarët. Inez Hajrulla bënte plane për të vrarë Fatmir Hysenin, e kërkonte në çdo moment. Kërkonte dhe një tjetër personazh, që të bindte në gjurmët e Amrando Sulejmanit, që e konsideronte si kundërshtarin e tij. Ata vrasjen e një personi e konsideronin -1. Momenti i dytë që më ka bërë përshtypje, ishin kontrollet që u bënë te zona e Ujit të Ftohtë. Për të hyrë te banesat e tyre, kishte kamera sigurie, skarë të çeliktë, derë të blinduar dhe në fund shkoje brenda në banesë. Po ashtu një detaj tjetër për mënyrën e madhe të organizmit, është plani për vrasjen e Bledar Birçës. Ata i kishin vënë kamera sigurie dhe në lokalin e tij. Këdo që shikonin se bashkëpunonte me kundërshtarët e tyre, edhe një person të thjeshtë, e vinin në shënjestër dhe bënin plan për ta vrarë. Inez Hajrulla mund të fshihet në Greqi, për shkak se partnerja e tij ka humbur dokumentet e saj në Greqi dhe ka shkuar të bëjë denoncim. Ky është një alarm që përdoret si e dhënë. Mendohet se ajo mund të ketë qenë në shoqërinë e Hajrullës. Dosha, disa ditë para aksionit, është vëzhguar në Vlorë. Mendohet se mund të jetë informuar për aksionin e policisë, pasi ende nuk është arrestuar.”, tha ajo.
