Një influencuese kineze, e njohur për gjatësinë e saj prej 2.18 metrash dhe videot që publikonte me bashkëshortin, ka ndërruar jetë në moshën 26-vjeçare. Lajmi u bë i ditur nga bashkëshorti i saj, Zihao, i cili ndau një mesazh prekës në rrjetet sociale. Xiao Yue vuante nga gjigantizmi hipofizar, një gjendje e rrallë që shkaktohet nga prodhimi i tepërt i hormonit të rritjes. Ajo vuante gjithashtu nga diabeti sekondar dhe, sipas bashkëshortit, gjendja e saj shëndetësore ishte përkeqësuar në muajin korrik.

Influencuesja ishte diagnostikuar edhe me një tumor të hipofizës dhe një meningiomë, ndërsa ishte planifikuar t’i nënshtrohej një ndërhyrjeje kirurgjikale. Megjithatë, ajo ndërroi jetë para se të kryhej operacioni. “Mjeku më tha se, në fakt, gjendja ishte relativisht e lehtë dhe se asaj do t’i duhej vetëm një procedurë minimale invazive për të hequr tumorin nga truri. Nuk e kisha imagjinuar kurrë se kjo sëmundje do t’i merrte jetën dikujt”, shkroi Zihao në homazhin për bashkëshorten.

Ai shtoi se tashmë ajo është çliruar nga dhimbjet dhe vuajtjet, duke shprehur dëshirën që të gjejë paqe dhe gëzim. Xiao Yue ishte nga provinca e Sichuanit dhe ishte dukshëm më e gjatë se bashkëshorti i saj, i cili është 1.65 metra i gjatë. Çifti kishte qenë së bashku për katër vjet dhe kishte fituar një numër të madh ndjekësish duke publikuar momente nga jeta e tyre e përditshme.

Në tetor të vitit 2025, ata u bënë prindër të një djali. Postimi i fundit i Xiao Yue në rrjetet sociale daton më 18 gusht. Në përshkrimin e videos, ajo kishte shkruar: “Edhe pse jeta është plot vështirësi, përsëri ka ngrohtësi që më mbështet”. Pas përhapjes së lajmit për vdekjen e saj, ndjekësit kanë mbushur profilin e influencueses me mesazhe ngushëllimi për familjen dhe bashkëshortin e saj.