Konflikti në Iran po shërben si një laborator në kohë reale për Kinën dhe Rusinë, të cilat po studiojnë nga afër aftësitë dhe dobësitë e ushtrisë amerikane, raporton Wall Street Journal.

Sipas raportimit, të dy vendet, së bashku me Korenë e Veriut, kanë ndjekur përdorimin e sistemeve të reja ushtarake të SHBA në terren, përfshirë sulme ajrore me precizion të lartë dhe operacione të mbështetura nga inteligjenca artificiale.

Po ashtu, analistët theksojnë se po vëzhgohet me kujdes shpejtësia e konsumimit të municioneve dhe sistemeve kyçe si raketat Tomahawk dhe sistemet e mbrojtjes ajrore Patriot.

Raporti nënvizon gjithashtu se dronët me kosto të ulët të përdorur nga Irani kanë arritur të krijojnë rreziqe reale për disa nga aleatët amerikanë në rajonin e Gjirit, duke ndryshuar mënyrën e vlerësimit të kërcënimeve moderne.

Sipas WSJ, një pjesë e pajisjeve ushtarake iraniane përdor teknologji ose komponentë me origjinë nga Kina, gjë që i jep Pekinit akses indirekt në të dhëna operacionale, veçanërisht mbi sulmet ndaj bazave amerikane në rajon.

Për Rusinë, konflikti po shërben si një burim i rëndësishëm për krahasimin e performancës së armëve amerikane me ato iraniane, sidomos në fushën e dronëve, një element gjithnjë e më dominues në luftërat moderne.

Analistët vlerësojnë se këto të dhëna mund të jenë të vlefshme për Moskën në kontekstin e luftës në Ukraina, si dhe në përgatitjet e mundshme për përplasje të ardhshme me vendet e NATO.