Një femër dyshohet se ka qenë shkaku i përplasjes mes disa të rinjve në Shijak, ku mbeti i plagosur rëndë shtetasi Denis Çumani.

Burime nga grupi hetimor bëjnë me dije se Çumani kishte ngacmuar një vajzë, e cila ishte në një lidhje me shtetasin Dorian Ferra.

Në momentin që Dorian Ferra ndodhej në një lokal së bashku me vajzën, kjo e fundit po merrte vazhdimisht mesazhe nga Denis Çumani, të cilat ajo i fshinte për të shmangur konfliktin.

Pas këmbënguljes së Ferrës për të mësuar se kush po i shkruante të dashurës së tij, ai u informua mbi identitetin e personit.

Më pas, Dorian Ferra, së bashku me kushëririn e tij, shtetasin Indrit Ferra, janë drejtuar drejt banesës së Denis Çumanit, ku e kanë dhunuar atë me grushte dhe shkelma.

Sipas hetimeve, ata i kanë vendosur edhe pistoletën në kokë dhe më pas në brinjë, duke e qëlluar një herë dhe duke e lënë të plagosur.

Fillimisht, i dëmtuari është dërguar në spitalin e Durrësit, ndërsa më pas është transportuar me urgjencë drejt Spitalit të Traumës në Tiranë, ku ndodhet në gjendje të rëndë shëndetësore.

Ndërkohë, dy kushërinjtë janë larguar nga vendi i ngjarjes dhe policia vijon punën për lokalizimin dhe arrestimin e tyre.