TIRANE- Zona e Lundrës në Tiranë është bërë vitet e fundit vendi i preferuar për banim nga miliarderët e Tiranës mes të cilëve politikanë, ish-kryeministra e fëmijë ish-kryeministrash, maniatë mediash, biznesmenë etj. Por Gazeta Dita ka mësuar se brenda kompleksit luksoz ka blerë një vilë edhe ambasadorja e BE-së, Romana Vlahutin, të paktën kështu thuhet në kontratën noteriale që ata sigurojnë.
Dokumentet zbulojnë se rezidenca e re e ambasadores Vlahutin është blerë me fonde të BE-së për plot 1 milion e 649 mijë euro, duke u renditur ndoshta në top listën e vilave më të shtrenjta të këtij kompleksi luksoz.
Bëhet fjalë për një vilë rreth 345 metra katrorë në një truall rreth 1600 metra katrorë.
Dita gjithashtu ka mësuar se një mision auditi i BE-së do udhëtojë drejt Tiranës.
Ndërkohë një tjetër fakt kurioz i shton dyshimet: Agjencia e njohur për shkrime investiguese BIRN, e la përgjysëm hetimin për këtë blerje për arsye ende të panjohura.
Hetimi u ndërpre në momentin që analiza krahasimore e çmimit të vilave në këtë kompleks nxori në pah një të dhënë shumë kompromentuese: Çmimi i vilës në fjalë, as në shkurt 2015 kur u lidh kontrata, as sot e kësaj dite nuk i kalon të 1 milion eurot.
Një jurist i kontaktuar nga Dita thotë se duhet parë bazuar në çfarë rregullash zyra e BE në Tiranë ka vendosur të bëjë një blerje të tillë, pse vilë për ambasadoren dhe jo zyra për shembull; përpos faktit që duket e pa precedentë që një organizatë multinacionale blen prona në një shtet të caktuar.
E pyetur nga Dita, Ministria e Drejtësisë nuk pranoi të jepte informacion mbi rastin, por gazeta disponon aktin noterial të blerjes.
(BalkanWeb)
