Zëvendëskryeministri dhe ministri i Jashtëm italian deklaroi se Izraeli duhet të përmbahet nga sulmet në Rafah dhe duhet të shpallë menjëherë një armëpushim, duke theksuar se çdo ndërprerje e armiqësive nuk mund të jetë e njëanshme.

Antonio Tajani mbajti një konferencë  për shtyp pasi zbarkoi në Gjermani  të premten për të marrë pjesë në Konferencën e 60-të të Sigurisë në Mynih dhe tha se ministrat e jashtëm të vendeve të G7 do të mbajnë takimin e tyre të parë të shtunën nën presidencën italiane si pjesë e Konferencës.

Ai theksoi se vendet e G7 mund të lëvizin drejt një armëpushimi në Rripin e Gazës për lirimin e pengjeve.

“Nëse Hamasi dëshiron gjithashtu të mirën e popullit të tij, ai duhet të ndalojë të gjitha aktet e luftës dhe të lirojë pengjet,” tha ai. “Pa lirimin e tyre, çdo negociatë është e vështirë”.

Izraeli ka goditur Rripin e Gazës që nga sulmi i Hamasit më 7 tetor, duke vrarë të paktën 29,155 njerëz dhe duke plagosur 69,170 të tjerë, ndërsa rreth 1,200 izraelitë besohet se janë vrarë në sulmin e Hamasit.

Lufta izraelite në Gaza ka shtyrë 85% të popullsisë së territorit në zhvendosje të brendshme mes mungesës akute të ushqimit, ujit të pastër dhe ilaçeve, ndërsa 60% e infrastrukturës së enklavës është dëmtuar ose shkatërruar, sipas OKB-së.

Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Aviv-in të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.