Zëvendëspresidentja e Venezuelës, Delcy Rodriguez, mohoi të enjten se kishte negociuar me Shtetet e Bashkuara për të larguar Presidentin Nicolas Maduro nga pushteti, siç pretendoi një gazetë amerikane.
Gazeta Miami Herald raportoi më herët të enjten se Rodriguez dhe vëllai i saj Jorge, kryetari i parlamentit, kishin negociuar me Uashingtonin për të larguar Presidentin Maduro dhe për të mbetur në pushtet, pa zbuluar burimet e saj.
“Gënjeshtra! Një tjetër media vazhdon ndyrësinë e luftës psikologjike kundër popullit venezuelian. Ata nuk kanë moral, nuk kanë parime, përhapin gënjeshtra dhe kalbje”, ishte reagimi i zëvendëspresidentes Rodriguez nëpërmjet Telegram.
“Revolucioni bolivarian mbështetet te udhëheqja më e lartë politiko-ushtarake e bashkuar rreth vullnetit popullor”, vazhdoi ajo, duke shoqëruar postimin me një foto të saj në krah të kreut të shtetit me mbishkrimin: “së bashku dhe të bashkuar me Presidentin Maduro”.
Sipas Miami Herald, Rodriguez e bëri propozimin nëpërmjet kontakteve në Katar, një vend që ka luajtur një rol ndërmjetësues në shkëmbimet e të burgosurve midis Shteteve të Bashkuara dhe Venezuelës.
Uashingtoni ka vendosur shtatë anije luftarake dhe një nëndetëse me energji bërthamore në Karaibe dhe një tjetër në Gjirin e Meksikës, si pjesë e një manovre që e paraqet si një operacion kundër narkotikëve që synon konkretisht Venezuelën dhe Presidentin e saj Maduro.
Presidenti i SHBA-së Donald Trump, i cili konfirmoi këtë javë se ka urdhëruar operacione të fshehta të CIA-s në Venezuelë, ka njoftuar të paktën pesë sulme që nga fillimi i shtatorit kundër motoskafeve që ai thotë se transportonin drogë. Sulmet me raketa kanë vrarë të paktën 27 persona, sipas asaj që ai dhe qeveria e tij kanë njoftuar.
“A mund ta besojë dikush se CIA nuk ka vepruar në Venezuelë për 60 vjet? A mund ta besojë dikush se CIA nuk ka komplotuar për 26 vjet kundër ish-presidentit të ndjerë Hugo Chavez dhe kundër meje?”, komentoi Maduro dje, gjatë një eventi zyrtar.
