Deri më tani, autoritetet zvicerane kanë ngrirë asete dhe fonde ruse me vlerë 5.75 miliardë franga zvicerane (6.17 miliardë dollarë) për shkak të luftës në Ukrainë, njoftoi sot Erwin Bollinger i Sekretariatit Shtetëror për Çështjet Ekonomike (SECO) në Bernë.
Pavarësisht se nuk është një vend anëtar i BE-së, Zvicra ka përmbushur kërkesat e Bashkimit Evropian për vendosjen e sanksioneve ndaj Moskës.
“Shuma e ngrirë nuk mund të barazohet me të gjitha asetet ruse në Zvicër”, tha Bollinger, i cili është përgjegjës për marrëdhëniet ekonomike dypalëshe në SECO.
“Gjithashtu janë sekuestruar llogari bankare dhe prona. Shteti gjithashtu ka akses në objektet e artit dhe metalet e çmuara, megjithëse këto nuk bëhen pronë e shtetit, pasi nuk ekziston asnjë bazë ligjore për një transferim të tillë në Zvicër”, tha Bollinger.
