Mbrojtësi i Kombëtares Shqiptare, i cili në orët e ardhshme pritet të shndërrohet në futbollistin më të ri të Atalantës, prishi me konsensus kontratën që e lidhte me skuadrën e drejtuar nga trajneri Sami Hipia deri më 30 qershor të këtij viti. Ishte vetë klubi i Zyrihut, që me një komunikatë në faqen zyrtare bëri të ditur zgjidhjen e menjëhershme të kontratës me Gjimshitin. Klubi i Zyrihut nëpërmjet fjalëve të presidentit Ançilo Kanepa e justifikoi vendimin e marrë me faktin se dëshironte t’i jepte mundësinë Beratit të gjente një skuadër të re ku mund të luajë më shumë, në mënyrë që të ketë mundësi të grumbullohet nga Shqipëria në “Euro 2016”.
22-vjeçari ishte bashkuar me skuadrën e parë të Zyrihut në vitin 2012 dhe gjatë kësaj periudhe Gjimshiti ka luajtur 135 ndeshje zyrtare, duke shënuar dhe 6 gola. Në fund të komunikatës klubi i Zyrihut i uron fat mbrojtësit të përfaqësueses kuqezi në karrierën e tij të mëtejshme. Këtë të hënë, Berat Gjimshiti pritet të zyrtarizohet si lojtari më i ri i Atalantës. Padyshim që ky mund të konsiderohet një hap i madh për karrierën e 22-vjeçarit, që debutoi me Shqipërinë në barazimin 0-0 me Danimarkën në Kopenhagen shtatorin e kaluar, për t’u bërë më pas protagonist edhe me golin ndaj Armenisë në ndeshjen që vulosi kualifikimin e Kombëtares Kuqezi në “Euro 2016”. Interesimi për Vedat Muriqin po i kalon kufijtë e Turqisë.
Sulmuesi nga Prizreni, i cili luan me Giresunsporin, po vëzhgohet edhe nga skuadra të njohura europiane. Holandezët e PSV po mendojnë për Muriqin, i cili për moshën e re shikohet si një lojtar me perspektivë. 21- vjeçari përfundoi edhe në planet e Fulhamit, ekipit të kategorisë së dytë angleze. Vedat Muriqi ra në sy pas 9 golave të shënuar në fazën e parë të kampionatit, fillimisht për ekipet e Superligës së Turqisë, por tani edhe jashtë këtij kampionati. Giresunsporin kërkon 2 milionë euro për sulmuesin. Muriqi është tepër i shpejtë dhe lëviz mirë në fushë, edhe pse është i gjatë 1.94 metra. Ai është aktivizuar edhe me Kombëtaren Shpresa.
(ed.me/GSH/BalkanWeb)
