TIRANE- Prej gati një viti nëna e tij treten nën dhe, babai është në burg, ish-bashkëshortja po ashtu, ndërsa një fëmijë pret të marrë atësinë. Olti Lamit i është përmbysur bota mbi shpinë që kur ka parë videon e hoxhës, ku ish-nusja e tij pranonte të kishte vrarë vjehrrën.
Në një rrëfim ekskluziv për gazetaren Dorjana Bezat në “News 24” dhe “BalkanWeb”i riu thotë se kishte pasur dyshime tek nusja e tij edhe pas varrimit të nënës. Sjelljet e Marjanës dhe disa shenja në trupin e saj e kanë bërë të riun të dyshonte.
“Mami kishte shenjën e kafshimit në fytyrë dhe gërricje me thonj në pjesën e buzës. Një ditë pas varrimit të saj (Marjana) më tha mua do vish pak tek dhoma se kam frikë për tu ndërruar. Po mirë thashë, po vi me ty dhe kur hoqi bluzën i pashë disa shenja të zeza në krah. E pyeta se ku i kishte bërë ato shenja dhe më tha që ia kishin bërë gratë ditën e varrimit, duke i thënë të mos qante…Ajo domethënë nuk ka qarë fare atë ditë vetëm se rrinte me kokën ulur dhe aty më hipën shumë dyshimet që kjo ka gisht në këtë pjesë”,- thotë Olti për “News24” dhe “BalkanWeb”.
Dyshimet e tij u konfirmuan pas pesë ditësh kur nga morgu iu mbërrin dokumenti se 48-vjeçarja Lirije Lami ishte vrarë. Menjëherë pas këtij lajmi nusja largohet nga shtëpia.
Dyshimet se nusja mund t’i kishte vrarë nënën e shqetësonin shumë Oltin dhe shkoi tek hoxhë Hyseni për të kërkuar ndihmë, por në vend të qetësisë shpirtërore ai mësoi të vërtetën e tmerrshme që Marjana ishte vrasësja dhe se për këtë krim ishte konsultuar me dy familjarët e saj.
“Ndodheshe me fytyrë komplet, ishte ulur në një divan dhe tregonte komplet ngjarjen se si e mbyti. Thoshte që e thirra hajde futu brenda tek shtëpia dhe i dhashë një lëng portokalli. I thashë merre këtë lëngun se na e ka dhënë një hoxhë për të na bo mirë të gjithëve, e kemi pi të gjithë, pije dhe ti, por ka pak erë të rëndë, por këtë e kemi pirë të gjithë ne. Dhe mami siç thoshte ajo, kishte thënë po mirë do e pi edhe unë që të na bëjë mirë të gjithëve“,- tregon i riu.
Sipas rrëfimit që hoxha i ka treguar Olsit, Marjana vendimin për të helmuar vjehrrën nuk e ka marrë vetëm. “Kam pyetur mamin dhe vëllain tim, se nuk mund ta merrja një vendim të tillë pa pyetur familjen time”,- mësohet t’i ketë thënë ajo hoxhës.
E për të shuar zhurmën e vrasjes së vjehrrës Marjana inskenoi edhe një tentativë vetëvrasjeje.
“Po të merrte vesh Olti që unë kam bërë tentativë vetëvrasje do ta hiqnim vëmendjen nga gjithë pjesa tjetër. Këtë thoshte dhe do e mbaj vetëm tek unë, që ta harrojmë këtë pjesën e vrasjes”,- shton Olti duke iu referuar videos 72 minutëshe që ka parë tek hoxhë Hyseni.
(m.a/BalkanWeb)
