Lufta virtuale mes dy reperve, Drake dhe Kendrick Lamar ka marrë një kthesë shumë të papritur, pasi Lamar po akuzon Drake se ka një vajzë që e mban të fshehur nga bota për më shumë se një dekadë. Lamar i hodhi akuzat bombë në këngën e tij të fundit diss, “Meet the Grahams”.

Kjo nuk është hera e parë që atësia e Drake është temë kryesore mes betejave virtuale rap. Në vitin 2018, Pusha T ekspozoi djalin e Drake, Adonis, në këngën “The Story of Adidon”. Drake konfirmoi se Adonis ishte djali i tij në vitin 2020, por akuza e fundit e Lamar hedh një tjetër sekret në jetën personale të Drake.

Në “Meet the Grahams”, Lamar shprehet: “E dashur vogëlushe / Më vjen keq që babai yt nuk është aktiv në botën tënde / Ai nuk angazhohet për shumë, përveç muzikës së tij , po, kjo është e sigurt.”

Teksti tregon për një baba neglizhent, që i jep përparësi karrierës së tij mbi fëmijën.

Një burim i afërt me Drake i tha TMZ të shtunën se akuzat se ai kishte një vajzë sekrete ishin krejtësisht të pavërteta.

Përgjigja e Drake erdhi me shpejtësi përmes Story-t tij në Instagram. Duke përdorur një sërë emoji-sh për të qeshur dhe humorin, ai shkroi: “jooo prisni, a mund ta gjejë dikush vajzën time të fshehur ju lutem dhe ta dërgojë tek unë… këta djem janë katastrofë”.

Vlen të përmendet se si Drake, ashtu edhe Lamar, pohuan në këngët e tyre përkatëse se synonin t’i mbanin familjet e tyre jashtë betejës së repit. Megjithatë, asnjëri nuk e mbajti fjalën. Kënga diss e Drake, “Family Matters”, akuzon Lamar për dhunë në familje dhe tradhti, ndërsa Lamar flet mbi prindërit e Drake dhe madje edhe nënën e tij të ndjerë.

E vërteta pas pretendimit të Lamar mbetet e mbuluar me mister. Me të dy reperët e njohur për thurjen e së vërtetës dhe trillimit në muzikën e tyre, mund të kalojë pak kohë para se bota ta dijë me siguri nëse Drake ka vërtet një vajzë të fshehur.