Ditën e sotme është finalja e “Kënga Magjike”, edicioni i 19-të. Të shumta janë surprizat që na presin dhe prapaskenat që pëshpëriten lart e poshtë për atë që do të jetë fituesi i këtij edicioni. Në një intervistë ekskluzive për “Bluetooth” të “Gazeta Shqiptare”, ka qenë pikërisht një nga moderatoret bukuroshe të këtij edicioni, Nevina Shtylla, njëkohësisht moderatore në KlanTv të “Jo vetëm modë”. Ajo na ka rrëfyer marrëdhënien e saj me moderatorët e tjerë, prapaskenat e përfolura këto ditë të jurisë si dhe nuk ka harruar të përmendë edhe të japë mendimin e saj për këngën që mund të fitojë këtë edicion.

Është hera e dytë që merrni pjesë te “Kënga Magjike”. Si ndiheni të jeni sërish pjesë e një formati të tillë?
Padyshim e lumtur për këtë pjesëmarrje. Është hera ime e dytë dhe duke u bazuar tek eksperienca e mëparshme, më duhet ta pranoj se e paragjykova pak. Por ndihem shumë e kënaqur për këtë mundësi të dytë, sepse këtë herë po e shijoj në maksimum çdo minutë. Si prezantues, jemi të gjithë në harmoni dhe ka një frymë vërtetë pozitive mes nesh.

Si ndodhi përzgjedhja nga Arditi për të qenë prezantuese e “Këngës Magjike”?
Besoj se ishte diçka e natyrshme. Një ide që mund t’i ketë ardhur me lajmin se do t’i bashkoheshim familjes së TV Klan. Nuk na e ka zbuluar ende së çfarë e nxiti saktësisht, por cilado qoftë arsyeja, i jam mirënjohëse. Çdo eksperiencë krah Ardit Gjebreas është e vyer.

Këtë vit janë prezantuar shumë balada të bukura dhe prekëse. Ju nga gjithë këngët kë do të preferonit më tepër?
Këtë vit ka një konkurrencë të fortë mes artisteve big dhe new. Dua të jem asnjëanëse pasi edhe posti i prezantueses ma jep këtë kufizim. E vetmja gjë që nuk mund të mos e them është se këtë vit ka artistë të rinj të shkëlqyer.

Ka pasur ndonjë prapaskenë të papritur (zënkë) mes këngëtareve apo edhe mes prezantuesve?
Jo, as që bëhet fjalë. Mes prezantueseve e thashë dhe me parë, nuk e prisja, por përputhemi shumë mirë me njeri-tjetrin. Sa i takon këngëtarëve, as në backstage nuk kam vënë re tension mes ndonjërit.
Intevisten e plote mund ta lexoni ne GSH.al:http://www.gsh.al/2017/12/09/nevina-shtylla-ju-rrefej-prapaskenat-e-kenga-magjike-2017/