VLORE– I konsideruar si qyteti i palmave, rreth 200 të tilla u mbollën në Vlorë për t’i dhënë hijeshi shëtitores së Lungomares. Palmat e llojit “Uashingtoni”, i shtohen hapësirës së shëtitores së re buzë detit.
Kreu i bashkisë së Vlorës u shpreh se, me pemën që simbolizon imazhin mesdhetar të qytetit, jo vetëm plotësohet një prej dimensioneve dekorative të traditës, por krijohet edhe një element spikatës në ansamblin e gjelbërimit gjithëvjetor të qytetit.
Palmat me një lartësi mbi 8 metra do të hijeshojnë jo vetëm segmentin nga Skela deri tek ish-Akademia e Marinës, por do të zëvendësojnë edhe pemët e dëmtuara.
Punimet në Lungomare pritet të përfundojnë në muajin Maj dhe shëtitorja e re do jetë gati për sezonin turistik.
(el.sp/BalkanWeb)