Presidenti rus Vladimir Putin do të bëjë lëshime si pjesë e negociatave për t’i dhënë fund luftës Rusi-Ukrainë.
Presidenti i SHBA-së Donald Trump e tha këtë gjatë një bisede me gazetarët në Air Force 1, ndërsa ishte duke udhëtuar nga Davosi i Zvicrës për në Uashington.
Sipas tij, për të arritur një marrëveshje, të gjitha palët duhet të bëjnë lëshime, dhe edhe Evropa duhet të marrë pjesë në këtë proces, pasi është me rëndësi më të madhe për kontinentin e vjetër.
“Kishte raste kur Presidenti Putin nuk ishte gati të bënte një marrëveshje dhe kishte raste kur Presidenti ukrainas Volodymyr Zelensky nuk ishte gati – këto momente nuk përkuan. Tani për tani, mendoj se të dyja palët janë gati të negociojnë”, vuri në dukje Trump.
Ai theksoi se në takimin në Davos, udhëheqësi ukrainas shprehu gatishmërinë e tij për të nënshkruar një marrëveshje: “Nuk isha plotësisht i sigurt për këtë më parë.”
Duhet theksuar se një takim po zhvillohet aktualisht në Moskë midis Putinit dhe përfaqësuesit special të Presidentit të SHBA-së, Steve Witkoff, dhe dhëndrit të Donald Trump, Jared Kushner.
