Policia e Beratit ka zbuluar një subjekt tregtar në lagjen “10 Korriku” që ushtronte aktivitet të paligjshëm, duke shitur ora dore të kontrabanduara dhe imitime të markave të ndryshme, pa fatura tatimore dhe pa lëshuar kuponë fiskalë, si në dyqan ashtu edhe online.
Si rezultat i kontrolleve të ushtruara në kuadër të goditjes së informalitetit dhe tregtimit të produkteve të kontrabanduara, specialistët e Sektorit për Hetimin e Krimeve Ekonomike dhe Financiare konstatuan shkeljet dhe referuan materialet në Prokurori. Për këtë rast nisi procedimi penal ndaj pronarit të subjektit, shtetasit me inicialet A. D., 39 vjeç.
Gjatë kontrollit në ambientet e subjektit u sekuestruan 191 ora dore, të dyshuara të kontrabanduara, të cilat rezultonin imitime të markave të ndryshme. Nga verifikimet rezultoi se shtetasi nuk dispononte fatura blerjeje për mallrat dhe nuk lëshonte kuponë tatimorë gjatë shitjes së tyre.
Materialet procedurale i janë referuar Prokurorisë së Beratit për veprime të mëtejshme, ndërsa kontrollet kundër paligjshmërive në fushën ekonomike vijojnë në të gjithë territorin e qarkut.
