Zyrtarë amerikanë thonë se negociatat me Iranin janë futur në një fazë të brishtë, për shkak të një përçarjeje të thellë brenda strukturave të pushtetit në Teheran, ndërsa Donald Trump po shqyrton zgjatjen e armëpushimit për disa ditë të tjera. Sipas burimeve të cituara nga mediat ndërkombëtare, administrata amerikane beson se ekziston një ndarje e fortë mes udhëheqjes politike dhe strukturave ushtarake të Iranit, gjë që po pengon arritjen e një qëndrimi të unifikuar për një marrëveshje të mundshme bërthamore dhe përfundimin e konfliktit.
Zyrtarët thonë se Trump është i gatshëm të zgjasë armëpushimin edhe për 3 deri në 5 ditë, por jo pa afat, duke lënë të hapur mundësinë e përshkallëzimit nëse nuk ka përparim të shpejtë. Sipas raportimeve amerikane, në Iran po ekziston një konflikt i brendshëm midis negociatorëve politikë dhe komandantëve të Gardës Revolucionare. Ushtarakët dyshohet se kundërshtojnë disa prej propozimeve që vetë diplomatët iranianë kanë diskutuar në bisedime.
Gjendja komplikohet edhe nga roli i kufizuar i figurave kyçe në hierarkinë iraniane, përfshirë Mojtaba Khamenei, për të cilin zyrtarët amerikanë pretendojnë se ka komunikim të kufizuar me strukturat vendimmarrëse. Po ashtu, komandantë të Gardës Revolucionare Islamike raportohet se kanë kundërshtuar hapur disa vendime të ministrisë së jashtme, përfshirë çështje të ndjeshme si kontrolli i Ngushticës së Hormuzit. Sipas SHBA-së, kjo përçarje u bë e dukshme pas bisedimeve të para dhe u thellua pasi disa vendime të deklaruara nga diplomatë iranianë nuk u zbatuan nga strukturat ushtarake.
Uashingtoni gjithashtu po vëzhgon me kujdes mungesën e një përgjigjeje të qartë nga Teherani ndaj propozimeve të fundit, si dhe hezitimin për të hyrë në një raund të ri bisedimesh. Në këtë kontekst, udhëtimi i planifikuar i zëvendëspresidentit J.D. Vance drejt Islamabadit për negociata është shtyrë, në pritje të një qëndrimi të unifikuar iranian.
Rreziku i përshkallëzimit
Shtëpia e Bardhë po mban opsionet e hapura, duke paralajmëruar se nëse nuk ka përparim brenda ditëve të ardhshme, armëpushimi mund të përfundojë dhe situata mund të kthehet në përshkallëzim ushtarak. Për momentin, gjithçka varet nga fakti nëse Irani arrin të krijojë një linjë të unifikuar vendimmarrjeje – diçka që zyrtarët amerikanë thonë se ende nuk ekziston.
