Media izraelite Channel 12 raportoi se presidenti amerikan Donald Trump pritet të zhvillojë brenda 24 orëve të ardhshme një takim me rrethin e tij më të afërt të këshilltarëve për të vendosur mbi mundësinë e rifillimit të sulmeve ndaj Iranit.

Sipas raportimit, një zyrtar i lartë izraelit ka deklaruar se “rikthimi i armiqësive është shumë pranë”, ndërsa Izraeli po përgatitet për një skenar që mund të sjellë “ditë apo edhe javë përplasjesh”.

I njëjti burim tha se administrata amerikane ka arritur në përfundimin se negociatat me Iranin nuk po japin rezultat, ndërsa autoritetet në Jerusalem po presin vendimin përfundimtar të Trump.

Sipas zyrtarit, zhvillimet pritet të qartësohen brenda rreth 24 orëve, në një moment kur tensionet në Lindjen e Mesme mbeten tepër të larta.