Shefja e diplomacisë evropiane, Kaja Kallas, bëri thirrje për t’i dhënë fund “kontrollit” dhe “izolimit” të popullit të Kubës, i cili po vuan nga një krizë e thellë ekonomike dhe është nën presion në rritje nga Shtetet e Bashkuara.

“Pas dekadash keqmenaxhimi dhe shtypjeje politike, kriza ekonomike në Kubë po arrin një pikë kthese të vërtetë. Populli kubanez meriton mundësi dhe liri, jo më shumë kontroll dhe izolim”, tha zyrtari evropian gjatë një konference për shtyp në Mexico City me rastin e samitit Bashkimi Evropian-Meksikë.

Të enjten, Sekretari i Shtetit i SHBA-së, Marco Rubio, paralajmëroi Kubën se Shtetet e Bashkuara janë “të vendosura” të imponojnë ndryshime në ishullin komunist, një ditë pasi u ngritën akuza kundër ish-presidentit të vendit, Raul Castro.

“Sistemi i tyre ekonomik nuk po funksionon. Është i prishur dhe nuk mund ta rregullojmë me sistemin aktual politik”, u tha Rubio gazetarëve nga qyteti i tij i lindjes, Miami.

Tensionet janë përshkallëzuar midis Uashingtonit dhe Havanës, pasi përveç embargos amerikane në fuqi që nga viti 1962, Uashingtoni ka vendosur një bllokadë të plotë të naftës në ishull që nga janari, duke rezultuar në ndërprerje të pafundme të energjisë elektrike.

Kallas është në Meksikë me Presidenten e Komisionit Evropian Ursula von der Leyen për nënshkrimin e një marrëveshjeje të përditësuar tregtare midis Bashkimit Evropian dhe Meksikës.

Në janar 2025, BE-ja dhe Meksika përfunduan negociatat për të përmirësuar marrëveshjen e tyre tregtare, e cila parashikon eliminimin e pothuajse të gjitha tarifave ekzistuese për importet nga Bashkimi dhe lehtësimin e importeve nga Meksika.