Sot do të ketë mot relativisht të paqëndrueshëm në territorin e vendit tonë, me alternime kthjellimesh dhe vranësirash, ndërsa në disa zona parashikohen reshje shiu afatshkurtra.

Sipas parashikimeve meteorologjike, orët e paradites do të dominohen nga moti i kthjellët dhe temperaturat e ngrohta, kryesisht në ultësirën perëndimore dhe zonat bregdetare. Ndërsa gjatë mesditës dhe pasdites, vranësirat do të shtohen kryesisht në zonat malore dhe lindore të vendit, ku priten reshje lokale shiu me intensitet të ulët deri mesatar.

Temperaturat minimale pritet të luhaten nga 14°C në zonat malore deri në 19°C në bregdet, ndërsa maksimalet do të arrijnë deri në 27-28°C në qytetet e ultësirës perëndimore, përfshirë Tiranën, Fierin dhe Elbasanin.

Era do të fryjë e lehtë deri mesatare me drejtim veriperëndim-verilindje, ndërsa në vijën bregdetare dhe zonat luginore herë pas here do të ketë forcim të saj. Deti Adriatik dhe Jon do të paraqiten me valëzim të ulët deri mesatar.