Një histori e tmerrshme është zbuluar në Siri . Sipas raportimeve, mëlçia iu hoq me forcë një të burgosuri në Spitalin Ushtarak Tishreen gjatë regjimit të Bashar al-Assad.
Mjekët në gjyq rrëfyen se mëlçia e një të burgosuri ishte hequr dhe transplantuar te një person tjetër me urdhër të zyrtarëve të lartë të regjimit, dhe se si i burgosuri ashtu edhe ushtari që iu nënshtrua transplantit vdiqën pas operacionit.
Ministria Siriane e Drejtësisë publikoi video të marrjes në pyetje të oficerëve të lartë mjekësorë që kryen krime në Spitalin Ushtarak Tishreen gjatë regjimit të Asadit. Në video, Gjenerali i Brigadës al-Yaqzan Ahmed Hassan, i cili e identifikon veten si përgjegjës direkt për operacionin, rrëfen: “Me udhëzimet e Gjeneral Major Ammar Suleiman, Drejtor i Shërbimeve Mjekësore, unë, së bashku me ndihmësin tim Dr. Taysir Salih dhe anesteziologun Ali, kryem transplantin e mëlçisë.”
Ai deklaroi se ekipi i përfshirë në operacion përbëhej nga kirurgë dhe anesteziologë, duke shtuar: “Unë jam kirurg i mëlçisë. Asistentët e mi në operacion ishin Dr. Yaser Saleh, Dr. Saleh Hasan Yusuf, Dr. Haydar Suleiman Ahmed, dhe anesteziologët Dr. Ali al-Ali dhe Dr. Wail Sayyuh.”
Hassan tha se i burgosuri, të cilit iu hoq mëlçia, vdiq menjëherë pas operacionit dhe se ushtari që iu nënshtrua transplantit zhvilloi komplikime dy ditë më vonë dhe, pavarësisht se iu nënshtrua një operacioni tjetër, vdiq rreth një javë më vonë.
Një tjetër i pandehur në gjyq, gjeneral brigade Ibrahim Abbas Yezbek, tha se Ammar Suleiman mori urdhra vetëm nga udhëheqësi i rrëzuar i regjimit Bashar al-Assad dhe vëllai i tij Maher al-Assad.
Kreu i atëhershëm i Njësisë së Kujdesit Intensiv, Koloneli Ahmed Mahmoud al-Khatib, deklaroi se personi të cilit iu hoq mëlçia mbahej në Degën e 215-të të Inteligjencës Ushtarake dhe se shëndeti i tij ishte i mirë dhe shenjat e tij jetësore ishin të qëndrueshme para operacionit.
Prokurori i Përgjithshëm sirian, Hassan al-Turba, në një deklaratë për stacionin televiziv al-Ikhbariya, tha se Spitali Ushtarak Tishrin nuk ishte një institucion i zakonshëm shëndetësor, por “vepronte si një aneks i shërbimeve sekrete dhe shumë krime u kryen brenda ambienteve të tij”.
Duke deklaruar se spitali ishte nën kontrollin e oficerëve të rangut të lartë, Touba zbuloi: “Udhëheqësi i regjimit të rrëzuar, Bashar al-Assad, dhe vëllai i tij Maher al-Assad ishin gjithashtu të përfshirë në këtë krim. Ende nuk kemi qenë në gjendje të identifikojmë të burgosurin të cilit iu hoq mëlçia. Informacioni është marrë nga stafi që më parë punonte në spital dhe që atëherë është larguar.”
