Një situatë e pazakontë është regjistruar në Hungari, ku disa prej mediave kryesore publike kanë ndërprerë transmetimet pas humbjes së zgjedhjeve parlamentare nga kampi i ish-kryeministrit Viktor Orban.

Televizioni shtetëror M1 shfaqi në ekran një sfond të zi me një mesazh ku thuhej: “Media nuk mund të gënjejë. Kërkojmë falje që e kemi bërë këtë për vite me radhë.”

M1 është konsideruar prej vitesh si një prej mediave më pranë qeverisë së Viktor Orbán dhe është kritikuar nga kundërshtarët politikë dhe organizatat e medias për mungesë pavarësie editoriale dhe për transmetim të qëndrimeve të qeverisë.

Sipas raportimeve nga Hungaria, ndërprerja e transmetimeve ka prekur edhe radion publike Kossuth Rádió, ndërsa edhe platformat online të disa institucioneve mediatike shfaqën ekrane të zeza.

Kryeministri i ri hungarez Péter Magyar ka deklaruar se mediat publike do të kalojnë nën një administrim të ri. Sipas tij, përkohësisht do të pezullohen programet informative, ndërsa radioja do të transmetojë vetëm muzikë përmes një stacioni partner.

Magyar e cilësoi zhvillimin si “historik”, duke deklaruar se sipas tij ka përfunduar periudha e propagandës në mediat publike. Ai akuzoi strukturat e mëparshme mediatike se kishin shpërndarë informacione të njëanshme gjatë viteve të qeverisjes së Orbanit.

Gjatë 16 viteve në pushtet të Orbanit, kritikët kanë pretenduar se mediat publike hungareze humbën pavarësinë dhe u kthyen në mjete të kontrolluara nga shteti. Ndërkohë, mbështetësit e ish-kryeministrit kanë kundërshtuar këto akuza.

Partia e Magyar, Tisza Party, fitoi zgjedhjet parlamentare me premtimin për reformimin e institucioneve publike dhe rikthimin e pavarësisë së medias.

Nga ana tjetër, Viktor Orban ka reaguar duke e kundërshtuar procesin, duke e cilësuar atë si “një tjetër hap të tiranisë së Tiszas”.