Një fotografi e publikuar fillimisht në rrjetet sociale nga një ushtar izraelit ka shkaktuar reagime të forta ndërkombëtare, pasi tregon një palestinez nga Gaza të lidhur në sy, të shtrirë me fytyrë nga toka dhe të veshur vetëm me të brendshme. Organizatat për të drejtat e njeriut e konsiderojnë imazhin si një provë të mundshme të keqtrajtimit të të burgosurve dhe paralajmërojnë se ai mund të përbëjë një krim lufte.
Fotografia, e cila u postua në një llogari personale të mediave sociale me mbishkrimin në hebraisht “Mirëmëngjesi”, u fshi më vonë, por u bë virale pasi u shpërnda nga aktivistë palestinezë.
Oneg Ben Dror, nga organizata Mjekët për të Drejtat e Njeriut në Izrael (PHRI), deklaroi se si keqtrajtimi i të burgosurve, ashtu edhe publikimi i imazheve degraduese të tyre, mund të përbëjnë krime lufte.
Sipas tij, fotografia përforcon dëshmitë e mbledhura prej vitesh nga ish-të burgosur palestinezë dhe organizata të të drejtave të njeriut.
“Fotografia konfirmon atë që kanë zbuluar mijëra dëshmi të të burgosurve palestinezë. Qendrat izraelite të paraburgimit janë kthyer në kampe torture për palestinezët,” u shpreh ai.
Edhe Komiteti Publik Kundër Torturës në Izrael reagoi përmes drejtoreshës ekzekutive, Sari Bashi, e cila tha se mbajtja e një të burgosuri vetëm me të brendshme nuk ka asnjë justifikim sigurie dhe përbën shkelje të së drejtës ndërkombëtare.
“Lakuriqësia e detyruar, e ndjekur nga fotografimi dhe publikimi i imazheve të tilla në rrjetet sociale, është një formë e dhunës seksuale dhe gjithashtu një krim lufte,” deklaroi ajo.
Forcat Mbrojtëse të Izraelit (IDF) konfirmuan autenticitetin e fotografisë dhe njoftuan se kanë hapur një hetim të brendshëm.
“Incidenti nuk është në përputhje me vlerat dhe rregulloret e IDF-së,” tha një zëdhënës i ushtrisë izraelite.
Pas publikimit të fotografisë, të paktën dy nëna palestineze pretenduan se burri i lidhur në imazh është djali i tyre.
Rana Abu Nasser tha se është e bindur se fotografia paraqet djalin e saj, Osama, i arrestuar në mars pranë një zone të kontrolluar nga ushtria izraelite.
“Unë njoh çdo detaj të trupit të tij. Ai ka ënjtje në këmbë dhe të njëjtat shenja që pashë në fotografi,” tha ajo.
Një tjetër nënë, Joudeh al-Ghoul, deklaroi mes lotësh se beson se në foto është djali i saj, Amin, i zhdukur që nga nëntori i vitit 2023.
“Është ai. E njoha nga flokët dhe mjekra. Zemra e një nëne e njeh gjithmonë fëmijën e saj”, u shpreh ajo.
Ushtria izraelite nuk ka konfirmuar identitetin e personit në fotografi dhe nuk ka dhënë informacion nëse ai ka marrë kujdes mjekësor apo nëse familja e tij është njoftuar.
Sipas organizatave të të drejtave të njeriut, për muaj të tërë autoritetet izraelite nuk kanë dhënë informacion mbi fatin e shumë palestinezëve të arrestuar në Gaza. Organizata HaMoked pretendon se qindra persona vazhdojnë të rezultojnë të zhdukur, edhe pse arrestimi i tyre është dokumentuar nga dëshmitarë okularë.
