Kompania e kateringut “Sori-Al” do të vijojë aktivitetin e saj, pasi Autoriteti Kombëtar i Ushqimit (AKU) ka hequr masën e pezullimit të vendosur pas rastit të dyshuar të helmimit të 64 studentëve të Akademisë së Sigurisë në fund të muajit qershor.
Sipas AKU-së, verifikimet e kryera pas incidentit kanë përfunduar dhe rezultatet e analizave laboratorike për mostrat ushqimore, si dhe kontrollet e higjienës në ambientet e kompanisë, kanë rezultuar brenda kritereve të lejuara të sigurisë ushqimore.
Autoriteti ka bërë të ditur se gjatë inspektimeve të mëtejshme është konstatuar se subjekti ka përmbushur detyrimet ligjore dhe standardet e kërkuara për vijimin e veprimtarisë.
Po ashtu, kompania ka realizuar procedurat e vetëkontrollit, duke kryer analiza mbi ambientet e punës, pajisjet e përdorura dhe stafin, me rezultate që, sipas AKU-së, kanë qenë në përputhje me kërkesat në fuqi.
Pezullimi i aktivitetit të “Sori-Al” u vendos pas paraqitjes së simptomave të helmimit te 64 studentë të Akademisë së Sigurisë, ndërsa autoritetet nisën kontrollet për të evidentuar shkaqet e ngjarjes.
Njoftimi i AKU:
Autoriteti Kombëtar i Ushqimit në vijim të informimit publik dhe transparencës bën me dije, se referuar çështjes për dyshim helmimi të disa kursantëve, pranë Akademisë së Sigurisë, Sauk ka kampionuar më datë 25 .06.2026, 14 mostra nga vakti i drekës dhe darkës, në adresën Garnizoni “Skënderbej” Tiranë 14 mostra nga vakti i drekës dhe darkës, si dhe 5 mostra tamponë higjienë ambientale dhe të pajisjeve.
Nga laboratori i Referencës ISUV jemi informuar, se nga analizimi në total i 33 mostrave për treguesit mikrobiologjik kanë rezultuar brenda normave.
Në vijim të ndjekjes se problematikes në subjektin ”Sori-Al” në adresen Akademia e Forcave te Armatosura Garnizoni “Skenderbej”, për të cilin ishte marrë masë me ndërprerje aktiviteti, subjekti Sori-al ka bërë analiza autokontrolli tampone ambjental të ambjenteve, pajisjeve dhe punonjësve të cilat kane dalë konform kërkesave ligjore.
AKU më 10.7.2026 pas njoftimit të subjektit për rezultatet e analizave të vetëkontrollit , ka kryer inspektim në adresen Akademia e Forcave te Armatosura Garnizoni “Skenderbej”, gjatë së cilit ka marrë sërish 3 mostra tampon ambiental, të cilat u dërguan, për analizim pranë laboratorit të ISUV.
Me daljen e rezultatit të analizave konforme për kushtet e higjienës dhe të sigurisë ushqimore, për mostrat kontroll zyrtar të kampionuara me datë 25.06.2026 dhe të mostrave të marra me datë 10.07.2026 në subjektin ”Sori-Al” në adresen Akademia e Forcave te Armatosura Garnizoni “Skenderbej”, AKU ka kryer zhbllokimin e aktivitetit të subjektit ”Sori-Al” dhe OBU-së i lejohet të vijojë ushtrimin e aktivitetit të gatimit te ushqimeve në ambientet e kuzhinës që ndodhet brenda ambienteve të Garnizonit “Skenderbej”.
