Me pankarta, parulla dhe mesazhe plot ironi, qytetarët u mblodhën edhe këtë mbrëmje në sheshin “Skënderbej”, përpara nisjes së marshimit të përnatshëm që tashmë është kthyer në një ritual të protestës kundër qeverisë.
Në ditën e 54-t të rezistencës popullore në Tiranë, protestuesit shfaqën pankarta që godisnin jo vetëm qeverinë e kryeministrit Edi Rama, por edhe atë që e cilësojnë si klasën e vjetër politike. Mes tyre spikatën mesazhe me referenca satirike ndaj “matematikës së Zeqinës”, si dhe slogane që kërkonin largimin e Edi Ramës, Sali Berishës dhe përfaqësuesve të sistemit politik që, sipas tyre, ka qeverisur vendin prej dekadash.
Me sarkazëm dhe ironi, protestuesit përcollën kritikat e tyre për situatën politike dhe ekonomike në vend, ndërsa marshimi vijoi në rrugët kryesore të kryeqytetit, i shoqëruar nga thirrje kundër qeverisë dhe kërkesa për ndryshim politik.
